Ավելի քան 50 քաղաքացի՝  խաբեության զոհ. «Թրավել Ան» ընկերության տուր-մենեջեր Աննա Սահակյանը մի քանի կեղծ փաթեթներ է վաճառել: Ոմանք խաբեությունը բացահայտել են սահմանը լքելիս, երբ անցակետերում ու օդանավակայանում արգելել են դուրս գալ, քանի որ ամրագրված տոմս չի եղել: Ոմանք էլ լուրն իմացել են արդեն խաբվածներից: Այսօր արդեն այդ ընկերության ներկայացուցիչ Աննա Սահակյանը հայտնաբերվել և բերման է ենթարկվել, իսկ նրա ամուսինը, տուճածների պնդմամբ, փախել է երկրից: 

Աշխատանքի օրվա առթիվ Հայաստանի Կոմունիստական կուսակցության ներկայացուցիչներն այսօր անցկացրել են իրենց ավանդական մայիսմեկյանը երթը: Երգերով, կոչերով ու դրոշներով ուղեկցվող երթն ընթացել է Մաշտոցի պողոտայից մինչև Շահումյանի հրապարակ, որտեղ էլ տեղի է ունեցել հանրահավաք: Կոմունիստները կարոտով են հիշել, թե ինչպիսի խանդավառությամբ էին նախկինում տոնում մայիսի մեկը, իսկ հիմա ավելի շատ մտահոգ են, քան ուրախ: Նրանց խոսքով՝ տոնը հնարավոր կլինի ըստ արժանվույն նշել, եթե Հայաստանում գործազրկություն և արտագաղթ չլինի, վերականգնվեն փակված գործարանները, քաղաքացիներն ունենան արժանապատիվ աշխատանք: Կոմունիստները նաև դիմել են վարչապետին՝ առաջարկելով իրենց օգնությունը հայ-ռուսական հարաբերությունների ամրապնդման գործում։ Արհմիությունների ներկայացուցիչներն էլ երթ են անցկացրել՝ նվիրված աշխատողի իրավունքների պաշտպանությանը:

Կենդանաբանական այգու տարեշրջանի բացման օրը կրկին բողոքի ակցիա են իրականացրել այգու նախկին աշխատակիցները: Նրանք շարունակում են պահանջել այգու տնօրեն Ռուբեն Խաչատրյանի հրաժարականը: Վերջինը, սակայն, չի պատրաստվում հեռանալ՝ պնդելով, որ բողոքի ակցիաներն ուղղորդված են: Խաչատրյանի խոսքով՝ կենդանաբանական այգու ներսում տիրող իրականությունը ոչ մի կապ չունի բողոքող անձանց ներկայացրածի հետ: Նա նշել է, որ ակցիայի մասնակիցների հետ հանդիպելու ցանկություն չունի, նրանց հետ պատրաստ է շփվել միայն դատարանում:

Ադրբեջանում այսօր մեկնարկել են «Մուստաֆա Քեմալ Աթաթուրք 2019» ադրբեջանա-թուրքական մարտական կրակով համատեղ տակտիկական զորավարժությունները: Դրանց կմասնակցեն զրահատեխնիկա, հրետանային զորքեր, մարտական ուղղաթիռներ, ՀՕՊ ուժեր: Զորավարժություններն անցկացվում են Ադրբեջանի և Թուրքիայի միջև ռազմական գործակցության վերաբերյալ համաձայնագրի շրջանակում: Զորավարժություններին ուշի ուշով հետևում են Արցախում: «Նախ և առաջ, զորավարժությունների խորագիրն է շատ հետաքրքրական, այսինքն՝ թուրքականության, պանթյուրքիզմի ագրեսիվ փիլիսոփայության համատեքստում է: Սա ևս մեկ անգամ մեզ համար պետք է դաս լինի, որպեսզի հանկարծ չմոռանանք իրականությունը»,- ասել է Արցախի նախագահի մամուլի քարտուղար Դավիթ Բաբայանը: Զորավարժությունները կտևեն մինչև մայիսի 3-ը:

Ոստիկանները Հայաստանում բացահայտել են կիբերհանցագործության դեպք: Պարզվել է, որ Երևանում գործող «Պիկոնետ Տեքնոլոջիս» ընկերության աշխատակիցները, ԱՄՆ և Կանադայի օգտատերերի շրջանում տարածելով համակարգչի անվտանգությանը վերաբերող կեղծ նախազգուշացումներ, խաբեությամբ և վստահությունը չարաշահելու եղանակով հափշտակել են առանձնապես խոշոր չափի գումար: Հանցավոր ամբողջ գործունեությունը կազմակերպել և ղեկավարել է ընկերության ազգությամբ հնդիկ տնօրենը: Մանրամասները՝ տեսանյութում:

«Մուլտի Գրուպ» կոնցեռնի հիմնադիր Գագիկ Ծառուկյանի նախաձեռնությամբ Հայաստանում սկսված բամբակի արտադրության գործընթացին ծանոթանալու նպատակով այստեղ է Սիրիայում հայտնի «Սաբաղ Գրուպ» ընկերության վարչական կազմի նախագահ Ամար Սաբաղը: Սիրիացի գործընկերը շրջել է ցանքատարածությունում, ծանոթացել աշխատանքների ընթացքին: «Հայաստանի բամբակը որակով գերազանցում է բոլոր մրցակիցներին»,-նշել է նա՝ հույս հայտնելով, որ աշխատանքները բարեհաջող ընթացք կունենան և հավակնոտ ծրագիրն էլ ավելի կընդլայնվի: