Ալեքսանդր Սպենդիարյանի անվան Օպերայի և բալետի ազգային ակադեմիական թատրոնի գեղարվեստական ղեկավար եւ տնօրեն Կոնստանտին Օրբելյանը կլքի թատրոնի տնօրենի պաշտոնը: Մշակույթի նախարարի պարտականությունները կատարող Նազենի Ղարիբյանի հրամանը ուժի մեջ կմտնի ապրիլի մեկից: Ղարիբյանը պարզաբանել է, որ մաեստրոն տնօրենի պաշտոնում նշանակվել է օրենքի խախտումով: Կոնստանտին Օրբելյանն էլ նշել է, որ որոշումն իր համար անակնկալ չէր: Թե որո՞նք են լինելու նրա և թատրոնի աշխատակիցների հետագա քայլերը, կպատմի Հակոբ Գևորգյանը:
Կառավարությունն այսօր հաստատել է մի շարք նախագծեր, որոնք հնարավորություն են տալիս զարգացնել տնտեսությունը: Գյուղատնտեսության փոխնախարարը խոսել է այգի հիմնելու մասին: Պետությունը պատրաստ է մասնակի փոխհատուցել ծախսերն ու սուբսիդավորել այգեգործության համար ձևակերպվող վարկերի տոկոսադրույքները: 12 տոկոսով նաև վարկեր են տրամադրվելու տոհմային եղջերավոր կենդանիներ ձեռք բերելու համար: Ի դեպ, այդ 12 տոկոսից 10-ը ևս պետությունը վերցնում է իր վրա:
Վիեննայի «Բրիստոլ» հյուրանոցում ավարտվել է Հայաստանի վարչապետի և Ադրբեջանի նախագահի առաջին պաշտոնական հանդիպումը, որը տևել է 3 ժամ 15 րոպե: ՏԱՍՍ-ի հարցմանն ի պատասխան՝ Նիկոլ Փաշինյանն ասել է, որ հանդիպումը նորմալ է անցել: Իսկ Իլհամ Ալիևը, գո՞հ է արդյոք հանդիպման արդյունքից հարցին, որևէ պատասխան չի տվել: Հայաստանի և Ադրբեջանի ղեկավարների հանդիպումը նախ անցկացվել է երկու երկրների արտաքին գործերի նախարարներ Զոհրաբ Մնացականյանի, Էլմար Մամեդյարովի, ինչպես նաև ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրչիկի մասնակցությամբ: Ընդլայնված կազմով հանդիպմանը հաջորդել է Նիկոլ Փաշինյանի և Իլհամ Ալիևի առանձնազրույցը, որից հետո կրկին նախագահներին են միացել Մինսկի խմբի համանախագահներն ու Անջեյ Կասպրչիկը:
«Հայաստանի երկրորդ նախագահ Ռոբերտ Քոչարյանի գործով դատաքննությունը լինելու է դռնբաց, սակայն չի բացառվում` լինեն հատվածներ, որոնցով հրապարակային քննություն իրականացնելու արգելք լինի»,-խորհրդարանում հայտնել է Գլխավոր դատախազը: Արթուր Դավթյանը Մարդու իրավունքների եւ հանրային հարցերի մշտական հանձնաժողովում անդրադարձել է հանրային հնչեղություն ունեցող քրեական գործերին և վերջին շրջանի աղմկոտ իրադարձություններին : Եթե լինեն նոր երեւան եկած հանգամանքներ, հնարավոր է՝ վերաբացվի նաեւ հոկտեմբերի 27-ի գործը: Քննության է ուղարկվել նաեւ պաշտպանության նախկին փոխնախարար Վահան Շիրխանյանի նամակը, որտեղ կան գործով ուշագրավ մանրամասներ: Մարդու իրավունքների եւ հանրային հարցերի հանձնաժողովի նախագահ Նաիրա Զոհրաբյանն ասել է, որ նմանատիպ հանդիպումները լինելու են շարունակական:
Արագ զարգացող և ժամանակակից տեխնոլոգիաների աշխարհում պետք է լինի նաև Հայաստանը: Տարբեր երկրների առաջատար գիտնականները մեր երկրում են՝ մասնակցելու Երևանում անցկացվող «Էվոլյուցիա և արհեստական բանականություն» խորագրով միջազգային գիտաժողովին: «Գնացքից հետ չմնալու և մշտապես պարզ վերարտադրությամբ չզբաղվելու համար Հայաստանը պետք է մասնակից լինի ապագայի համար տեխնոլոգիաների ստեղծման գործընթացին: Իսկ գիտաժողովը լավագույն հարթակն է առաջատար գիտնականների հետ քննարկելու և սովորելու լավագույն փորձը»,- ասել է ՀՀ նախագահ Արմեն Սարգսյանը:
«Բարգավաճ Հայաստան» կուսակցության նախագահ, «Մուլտի Գրուպ» կոնցեռնի հիմնադիր Գագիկ Ծառուկյանն աշխատանքային այցով Արաբական Միացյալ Էմիրություններում է: Այցի շրջանակում նա հանդիպումներ է ունեցել Էմիրությունների քաղաքական վերնախավի և գործարար շրջանակների ներկայացուցիչների հետ: Մասնավորապես, թագաժառանգ շեյխ Սուլթան Բին Խալիֆա բին Զաիդ Ալ Նահյանի հետ առանձնազրույցում քննարկվել են տնտեսության տարբեր ոլորտներում համատեղ գործակցություն սկսելու վերաբերյալ հարցեր: Գագիկ Ծառուկյանը հանդիպումներ է ունեցել նաև Աբու Դաբիի, Դուբայի և Ֆուջեիրայի էմիրությունների բարձրաստիճան ներկայացուցիչների հետ: Քննարկման առանցքում եղել են ներդրումային տարբեր նախագծեր իրականացնելու և երկկողմ առևտրատնտեսական փոխգործակցությունը խթանելու հարցերը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv