Թեժ և լարված իրավիճակ մայրաքաղաքի կենտրոնում: Նիկոլ Փաշինյանի հրաժարականի պահանջով քաղաքացիական անհնազանդության ակցիաները շարունակվում են: Դաշնակցական երիտասարդները փորձել են փակել Մաշտոցի պողոտան: Ոստիկանները բռնի ուժով բերման են ենթարկել ցուցարարներին: Բիրտ ուժ է կիրառել նաև լրագրողների նկատմամբ: Ակցիայի մասնակիցները քայլերթով շարժվել են դեպի կառավարություն:
Ի կատարումն Նիկոլ Փաշինյանի ստորագրած հայտարության՝ Արցախի Լաչինի շրջանն այսօր անցել է Բաքվի վերահսկողության տակ: Այնտեղ արդեն ադրբեջանական զորքերն են: Բացառություն են կազմում Լաչինի միջանցքն ու Բերձոր, Աղավնո և Սուս համայնքները: Բերձորի քաղաքապետն «Էպիկենտրոն»-ին ասել է, որ նշված 3 բնակավայրերի բնակիչներն այսօր էլ չեն շտապում լքել հարազատ տները: Այս օրերին մեծաթիվ բերձորցիների կարելի է տեսնել նաև Երևանում: Նրանց հետ հանդիպել և զրուցել է մեր գործընկեր Նազելի Ստեփանյանը:
Արմավիրի մարզի անհայտ կորած 34 զինծառայողների ընտանիքները պահանջում են անհապաղ քայլեր ձեռնարկել իրենց որդիներին և ամուսիններին վերադարձնելու համար: Նրանք կրկին հավաքվել են Էջմիածնի այն զորամասի մոտ, որտեղից իրենց հարազատները ռազմաճակատ են մեկնել: Ակցիայի մասնակիցները նշել են, որ արդեն 42 օր է՝ որևէ տեղեկություն չունեն, այդ ընթացքում դիմել են տարբեր կառույցների, բայց ապարդյուն: Ծնողների հետ հանդիպել է զորամասի շտաբի պետը, տեղեկացրել՝ առաջիկա օրերին որոնողական աշխատանքները կսկսվեն: Անհայտ կորած զինծառայողների հարազատները զորամասից գնացել են ՌԴ դեսպանատուն, այնուհետև պաշտպանութան նախարարություն: Այնտեղ նրանք հանդիպել են ոստիկանական պատի:
Արկադի Ղուկասյանն ու Բակո Սահակյանն արձագանքել են Նիկոլ Փաշինյանի վերջին աղմկահարույց գրառումներին: Արցախի նախկին նախագահները հայտնել են,որ դեռևս հոկտեմբերի 19-ին Արայիկ Հարությունյանը պատերազմի դադարեցման առաջարկով պատրաստած է եղել նամակներ՝ ուղղված Պուտինին, Թրամփին, Մակրոնին,ինչպես նաև Փաշինյանին: Հայաստանի վարչապետը, սակայն, արգելել է հրապարակել նամակները՝ դրանով խափանելով նաեւ Արցախի և Հայաստանի նախկին նախագահների աջակցության ուղերձների հրապարակումը: Լևոն Տեր-Պետրոսյանը նույնիսկ պատրաստած է եղել իր գրավոր հայտարարությունը: Դրանում ընդգծվել է,որ Հայաստանի իշխանությունն իրավունք չունի անտեսելու Արցախի իշխանության պահանջը:
Գյումրիում արդեն երկրորդ օրն է՝ վարչապետի հրաժարականի պահանջով հացադուլ է իրականացնում Գյումրու թիվ երկրորդ դպրոցի տնօրեն Հովհաննես Պետրոսյանը: Առաջին հերթին իշխանափոխություն, հետո ստորագրված հայտարարության վերանայում, սրանք են անժամկետ հացադուլ հայտարարած Պետրոսյանի պահանջները:
Դատավոր Աննա Դանիբեկյանն այսօր հետաձգել է Ռոբերտ Քոչարյանի և մյուսների գործով դատական նիստը: Սեյրան Օհանյանի պաշտպան Կարեն Մեժլումյանը չի կարողացել ներկայանալ նիստին: 2-րդ նախագահի պաշտպան Հայկ Ալումյանը, անդրադառնալով Քոչարյանի անձնագրի հետ կապված վարչապետի գրառմանը, լրագրողներին ասել է՝ այդ գրառումը ևս մեկ ապացույց էր, որ այսօր դատախազությունը Նիկոլ Փաշինյանի խամաճիկն է, և այս գործով ուղղակի հնազանդ կերպով կատարում է վարչապետի քմահաճույքները:
Այսօրվանից սկսած Հայաստանի ու Արցախի բոլոր զորամասերից զինծառայողները 7-օրով արձակուրդ կգնան: Առաջին խմբերն արդեն տան ճանապարհին են, հայտարարել են պաշտպանության նախարարի հետ հանդիպման գնացած ծնողները: Պարտադիր ժամկետային զինծառայողների ծնողներից հինգ հոգի նախարարություն էր գնացել՝ նախարարի հետ քննարկելու տղաների ծառայությանը, պայմաններին ու արձակուրդին վերաբերող հարցեր: Հանդիպման արդյունքը, սակայն, հավաքվածներից շատերին չի գոհացրել:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv