Շարունակվող պատերազմում հրետանու դերի ու նշանակության մասին շատ է խոսվել, բազմիցս հրապարակվել են կադրեր՝ հրետանավորների հաջողված գործողություններից, սակայն իրենք՝ հերոսները, որպես կանոն քիչ են երևում: Արցախի մեր գործընկերներն այսօր հենց նրանցից մի քանիսի հետ են հանդիպել և զրուցել:
«Հարավային ուղղությամբ մարտերը շարունակվում են: Հիմնականում հակառակորդի փոքր խմբերը չեզոքացվում են օջախային մարտերում»,- 18:51-ին կատարած գրառման մեջ տեղեկացրել է ՊՆ ներկայացուցիչ Արծրուն Հովհաննիսյանը: Առավոտյան Արցախի ՊԲ-ն հարավում խոցել է հակառակորդի ինքնաթիռ: Այսօր հայտնի է դարձել, որ թշնամական ուժերը, բացի իսրայելական և թուրքական զինատեսակներից, արցախյան բանակի դեմ կիրառում են նաև չեխական 152 մմ տրամաչափի DANA ինքնագնաց հրետանային կայանքներ:
ՈւԵՖԱ-ն պատերազմական իրավիճակի պատճառով արգելել է իր հովանու ներքո անցկացվող մրցաշարերի և խաղերի անցկացումը Հայաստանում և Ադրբեջանում: Այդուհանդեհց, մեր երկրում ֆուտբոլային հանդիպումներ կկայանան, բայց Հայաստանի առաջնությունների մակարդակով: Այս ընթացքում մեր թիմերը և մարզաշխարհի այլ ներկայացուցիչներ փորձում են իրենց աջակցությունը ցուցաբերել Արցախին ու հայ զինվորին:
«Ղարաբաղի հարցը գոնե այս փուլում և այս փուլից սկսած բավականին երկար ժամանակ դիվանագիտական լուծում չունի»,- ՖԲ-ի ուղիղ եթերում հայտարարել է Նիկոլ Փաշինյանը: Նրա խոսքով՝ Ադրբեջանն այսօր ասում է, որ որևէ այլ բանի, բացի Ղարաբաղի կապիտուլյացիայից, համաձայն չէ: «Առանց Արցախի չկա Հայաստան, և հետևաբար, պաշտպանել Արցախի ժողովրդի իրավունքը նշանակում է պաշտպանել հայ ժողովրդի իրավունքը, իսկ դա իր հերթին նշանակում է կռվել հանուն այդ իրավունքների այնքան ժամանակ, մինչև հնարավոր կլինի դիվանագիտական եղանակով հասնել ընդունելի որևէ տարբերակի»,- ասել է Փաշինյանն՝ ընդգծելով, որ խոսում է հարցի վերջնական լուծման մասին: Վարչապետն ասել է, որ հակառակորդը մարտի է նետում արդեն իսկ վերջին ռեզերվները: Նիկոլ Փաշինյանը կոչ է արել կազմավորել կամավորական ջոկատներ, որոնք կդրվեն ԳՇ պետի տրամադրության տակ:
Ռազմաճակատում շարունակվող գործողությունների ֆոնին պայքարը չեն դադարեցնում նաև Եվրոպայի հայերը: Այսօր ևս բողոքի խաղաղ ակցիա է անցկացվել Բրյուսելում: Մեր հայրենակիցներն ավտոերթ են արել Եվրոպական խորհրդարանի և ՆԱՏՕ-ի կենտրոնակայանի տարածքներում:
Մի քանի հարյուր քաղաքացիներ այսօր բողոքի ակցիաներ են արել Հայաստանում Գերմանիայի ու Իտալիայի դեսպանատների մոտ: Ցուցարարները պահանջել են Արցախի ճանաչում և տեռորիստ Թուրքիայի դեմ պատժամիջոցների կիրառում: Գերմանիայի դեսպանը պատրաստակամություն է հայտնել լսել բողոքող քաղաքացիներից միայն մեկին, իսկ ահա Իտալիայի ներկայացուցչությունից ոչ ոք այդպես էլ չի արձագանքել: Ակցիայի մասնակիցները դեսպանատան դարպասները ներկել են եռագույնով և մեր դրոշը փակցրել դարպասին:
Ղարաբաղյան հակամարտության կարգավորման գործընթացում գնդակը Ռուսաստանի դաշտում է, հայտարարել է ԱԺ ԼՀԿ խմբակցության ղեկավար Էդմոն Մարուքյանը: Նրա հետ համաձայն են նաև ընդդիմադիր մյուս խմբակցությունում: ԲՀԿ-ական Արման Աբովյանը հրատապ է համարել Հայաստան-Ռուսաստան հարաբերությունների խորացումը, իսկ պատերազմական գործողությունների վերաբերյալ ԵՄ-ի արձագանքը համարել է խայտառակություն:
Կառավարության նախաձեռնությամբ արտահերթ նիստ է գումարել Ազգային ժողովը: Նիստում առաջին ընթերցմամբ ընդունվել է ռազմական դրությանը վերաբերող երկու նախաձեռնություն: Դրանցից մեկով առաջարկվում է պետությանը նվիրաբերելու նպատակով ԵԱՏՄ-ից ներմուծվող ապրանքներն ազատել հարկերից: Երկրորդով բանկերը կարող են ներել մարտերում զոհված կամ հաշմանդամ դարձած անձանց վարկերը՝ առանց հարկային հետևանքի:
«Ադրբեջանը շահագրգռված է ոչ թե զինադադարով, այլ՝ պատերազմը շարունակելով»,- «Հրապարակ»-ին տված հարցազրույցում ասել է Ռուսաստանի պետդումայի պատգամավոր, ԱՊՀ հարցերով հանձնաժողովի առաջին փոխնախագահ Կոնստանտին Զատուլինը: Ըստ նրա՝ Ռուսաստանը և Հայաստանը ստեղծված իրավիճակում պետք է եզրահանգումներ անեն: Զատուլինն անդրադարձել է նաև Հայաստանի ներքին իրավիճակին:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv