Հայաստանի դատավորները երեկ արտահերթ ժողով էին գումարել: Մոտ վեց ժամ տևած քննարկումներից հետո հայտարարություն ընդունեցին, արձանագրեցին, որ դատավորների ընդհանուր ժողովը ողջունում է դատական իշխանության նկատմամբ վստահության ամրապնդմանն ուղղված ցանկացած միջոցառում, որը սահմանված կլինի օրենքով և կիրականացվի օրենքի խստիվ պահպանմամբ: Դատավորների ընդհանուր ժողովը միաժամանակ խստորեն դատապարտում է դատավորների հանդեպ ցանկացած անհարգալից գործողություն և կոչ է անում ձեռնպահ մնալ դատական իշխանության հեղինակությունը նսեմացնող, դատավորների պատիվն ու արժանապատվությունն արատավորող հայտարարություններից, դատարանների բնականոն աշխատանքը խոչընդոտող ցանկացած գործողությունից: Դատավորների ընդհանուր ժողովը նաև արձանագրել է, որ Բարձրագույն դատական խորհրդի անգործությունը չի արտահայտում դատավորների հավաքական կամքը, և այդ մարմինը գործնականում չի երաշխավորում դատավորների անկախությունը:

Աջակցություն հայրենիքի պաշտպաններին ու նրանց ընտանիքներին, դպրոցներին և որ ամենակարևորն է՝ կյանքի նոր փուլ թևակոխող շրջանավարտներին: «Գագիկ Ծառուկյան» բարեգործական հիմնադրամը Գեղարքունիքի մարզում շարունակում է խոշորամասշտաբ նախաձեռնությունների շարքը: ԱԺ փոխնախագահ Վահե Էնֆիաջյանը, ԲՀԿ խմբակցության պատգամավոր Շաքե Իսայանը և Կանանց խորհրդի համանախագահ Լուիզա Սարգսյանը հիմնադրամի կողմից դրամական պարգևներ են հանձնել Գավառի և հարակից գյուղերի ավելի քան 300 շրջանավարտների: Նրանք նաև հանդիպել են Արցախում ծառայող զինվորների ծնողների հետ, ծանրոցներ հանձնել՝ հայրենիքի սահմանը հսկող տղաներին ուղարկելու համար: Հիմնադրամը նաև հերթական աջակցությունն է ցուցաբարել Գավառի թիվ 5 հիմնական դպրոցին: ԲՀԿ ներկայացուցիչների աշխատանքային այցի մանրամասները՝ Արթուր Հակոբյանի տեսանյութում: