Հայաստանում Ամերիկայի Միացյալ Նահանգների դեսպան Ռիսչարդ Միլսն ավարտում է պաշտոնավարումը: Հրաժեշտի հանդիպմանը նա պատասխանել է լրագրողների հարցերին և իր անցած ճանապարհի մասին խոսել գործընկերների հետ: Ամերիկացի դիվանագետը շեշտել է, որ վերջին ամիսներին հայերն ապրում են Նոր Հայաստանում, որտեղ փոփոխություններն ակնհայտ են: Դեսպանը վարչապետին նվիրել է ամերիկացի հեղափոխական Ջոն Ադամսի մասին գիրք և լրագրողներին պատմել հենց այդ գիրքը նվիրելու ուղերձը:

Կառավարությունում այսօր հանրային քննարկում է տեղի ունեցել Ընտրական օրենսգրքի բարեփոխումների նոր նախագծի շուրջ: Քննարկմանը մասնակցել են արտախորհրդարանական ուժերի և դիտորդական առաքելություն իրականացնող հասարակական կազմակերպությունների ներկայացուցիչներ: Թեև նոր նախագծով նվազեցվում է թե՛ խորհրդարանի անցողիկ շեմը, և թե՛ ընտրագրավի չափը, այդուհանդերձ, առաջարկներ են հնչել անցողիկ շեմը մինչև 1 տոկոս նվազեցնելու, իսկ ընտրագրավը զրոյացնելու վերաբերյալ: Օրենսգրքի նոր փոփոխություններով վերացվում է նաև ամենաշատ քննադատված դրույթներից մեկը՝ այսպես կոչված ռեյտինգային ընտրակարգը, մեկ այլ փոփոխությամբ էլ խորհրդարանում կանանց տոկոսը կլինի 30՝ նախկին 25-ի փոխարեն: Ընտրական օրենսգրքի նախագիծը գործադիրը շուտով կհաստի և կուղարկի Ազգային ժողով:

Էպիկենտրոնն ամիսներ առաջ անդրադարձել էր 10-ը հազար դրամ գողություն կատարած սիսանցի կնոջ՝ մեծ աղմուկ բարձրացրած պատմությանը: Հասմիկ Սարգսյանը պնդում էր, որ հարևանի տնից վերցրել էր ընդամենը 4 հազար դրամ և միայն ոստիկանության հորդորով ցուցմունքում ստիպված նշել 10-ը հազարի մասին: Առաջին ատյանի դատարանը կնոջը դատապարտել է 6,5 տարվա ազատազրկման, հետագայում վերաննքիչը մեկ տարով նվազեցրել է պատժաչափը: Այս ամսվա վերջին լրանում է գործը վճռաբեկ դատարան վարույթ վերցնելու ժամկետը: Հասմիկ Սարգսյանին աջակցողներն այսօր հավաքվել են վճռաբեկի մոտ՝ ի պաշտպանություն նրա:

Երևանի ավագանու ԲՀԿ խմբակցության անդամները հրաժարվում են ծառայողական մեքենաներից և դրանց հետ կապված բոլոր տեսակի ծախսերից: Այսօր խմբակցության անդամները ներկայացրել են, թե ինչպես են աշխատելու Երևանի նոր ձևավորվող քաղաքապետարանի ավագանիում։ ԲՀԿ ավագանու խմբակցությունն ընդդիմադիր է, սակայն չի պատրաստվում ոչ կատաղի ընդդիմանալ ամեն հարցի, ոչ էլ հնազանդ համաձայնել ցանկացած փոփոխության հետ: