Փոխհատուցման սկզբունքի փոխարեն կանխարգելման մեխանիզմ, հատուկ պահպանվող տարածքներում մինչև 100 տոկոսով աշխատավարձերի բարձրացում.այսօր 6-ամսյա աշխատանքն է ամփոփել նաև Բնապահպանության նախարաի պաշտոնակատար Էրիկ Գրիգորյանը: Ամուլսար, Թեղուտ,փոքր ՀԷԿ-եր, Սևանալիճ՝ նախարարի պաշտոնակատարը, մինչև ընտրարշավին մասնակցելու նպատակով արձակուրդ գնալն անդարադարձել է բնապահպանական ամենահրատապ խնդիրներին:
Լրագրողների հետ է հանդիպել Սպորտի և երիտասարդության հարցերի նախարարի պաշտոնակատարը: Գաբրիել Ղազարյանը ներկայացրել է մրցաշրջան 2018-ում նախարարության կատարած աշխատանքը, նաև այն, թե ինչ է սպասվում հայկական սպորտին մրցաշրջան 2019-ում: Գաբրիել Ղազարյանն ընդգծել է, որ նախարարությունը շարունակելու է մեծածավալ աշխատանք կատարել սպորտի մասսայականացման գործում:
Կիսամյակն է ամփոփել նաև տնտեսական զարգացման եւ ներդրումների նախարարի պաշտոնակատարը: Տիգրան Խաչատրյանը մտահոգիչ է համարել փոքր եւ միջին բիզնեսում առկա կոռուպցիան, որը դանդաղեցնում է բիզնեսի զարգացումը: Նախարարի պաշտոնակատարը նկատել է՝ օտարեկրյա ներդրումների ծավալի աճի տեղ էլ կա, կան բացեր նաեւ զբոսաշրջության ոլորտում. Առաջին հերթին Հայաստանի ճանաչելիության հարցն է:
«Պետք է սենյակից դուրս չգա՞մ»,- այսպես է արձագանքել Վարչապետի պաշտոնակատար Նիկոլ Փաշինյանը վարչական ռեսուրսը չարաշահելու վերաբերյալ Հանրապետական կուսակցությունից իր հասցեին հնչող մեղադրանքներին: Այսօր Հին Երևան նախագծի տարածքում շրջելուց հետո Փաշինյանը պատասխանել է լրագրողների հարցերին, խոսել հիմնականում ներքաղաքական իրադարձությունների մասին: Պատասխանելով 1 արտաքին քաղաքական հարցի՝ Նիկոլ Փաշինյանն ասել է, որ չի համարում, որ Բելառուսի հետ կրքերը բորբոքվել են: Լրագրողներ-Փաշինյան հարց ու պատասխանի մանրամասները՝ տեսանյութում:
Երկրում տնտեսական հեղափոխություն իրականացնելու և տնտեսության ներկա վիճակը գնահատելու ու ախտորոշելու համար հանրապետության 5 մասնագիտացված առաջատար բուհերի տնտեսագետների, գործարարների մասնակցությամբ անցկացվել է գիտագործնական խորհրդաժողով: Հայաստանի տնտեսության զարգացման արդի հիմնախնդիրները և ռազմավարական ուղղությունները խորագրով գիտաժողովին ներկա էր նաև վարչապետի պաշտոնակատարը: Նիկոլ Փաշինյանը կարևոր է համարել տնտեսության առողջացմանն ու թռիչքային զարգացմանն ուղղված զեկուցումներն ու տնտեսագիտական վերլուծությունները՝ դրանք համարելով տնտեսական հեղափոխության նախադրյալներ:
Լուսավոր Հայաստան կուսակցությունը ներկայացրել է խորհրդարանի արտահերթ ընտրությանն իր ռազմավարությունն ու գրաֆիկը: Քարոզարշավը կուսակցության համար մեկնարկելու է Ագարակ քաղաքից ,շրջելու են 47 համայնքով: Կուսակցությունը իրականացնելու է խաղաղ քարոզչություն, որի ընթացքում խոսելու է ոչ թե մրցակիցների թերությունների, այլ իր առավելությունների մասին: Լուսավորը նաև սև փիառ է համարել այն քաղաքական տեխնոլոգիաները, որոնցով այս կուսակցությանը կապում են նախկին իշխող քաղաքական ուժի՝ ՀՀԿ-ի հետ:
«Բարգավաճ Հայաստան» կուսակցության նախագահ Գագիկ Ծառուկյանի գլխավորած պատվիրակությունն աշխատանքային այցով մեկնել է Մոսկվա: ԲՀԿ առաջնորդին նախ ընդունել է Ռուսաստանի Դաշնային Ժողովի Պետական Դումայի նախագահ Վյաչեսլավ Վոլոդինը: Քննարկվել են Հայաստանի և Ռուսաստանի միջև տարբեր ոլորտներում գործակցությունը խորացնելու վերաբերյալ հարցեր: Գագիկ Ծառուկյանը հանդիպել է Պետդումայի փոխխոսնակ, Ռուսաստանի իշխող՝ «Եդինայա Ռոսիյա» կուսակցության խորհրդարանական խմբակցության ղեկավար Սերգեյ Նեվերովի, ինչպես նաև կուսակցության գլխավոր խորհրդի նախագահության միջազգային համագործակցության հարցերով հանձնաժողովի նախագահ Անդրեյ Կլիմովի հետ: Մոսկովյան հանդիպումների ընթացքում չի շրջանցվել նաև դեկտեմբերի 9-ին Հայաստանում կայանալիք խորհրդարանի արտահերթ ընտրությունների թեման:
Հայաստան համահայկական հիմնադրամի բոլոր նվիրատուներին այսօր շնորհակալություն է հայտնել Սփյուռքի նախարարի պաշտոնակատար Մխիթար Հայրապետյանը՝ նշելով, որ մինչև վերջերս վստահ չէին միջոցառման կազմակերպման ժամկետների հարցում: Անդրադառնալով հարցին, որ հեռուստամարաթոնում հավաքված գումարը նախորդ տարվա համեմատ պակաս էր՝ նախարարի պաշտոնակատարը նշել է՝ եղել են որոշակի օբյեկտիվ պատճառներ, օրինակ՝ ժամանակի սղությունը: Մխիթար Հայրապետյանն այսօր ներկայացրել է նաև Սփյուռքի նախարարության վերջին 6 ամսվա գործունեության հաշվետվությունը, հայտարարել, որ Հայաստանում տեղի ունեցած թավշյա հեղափոխությունից հետո հայրենիք է վերադարձել 450 ընտանիք:
Լոս Անջելեսում ավարտվել է Հեռուստամարաթոն-2018-ը: 12 ժամվա ընթացքում «Հայաստան» համահայկական հիմնադրամին նվիրաբերվել է 11 մլն 109 հազար 633 դոլար: Նվիրատվություններն իրականացվել են աշխարհի տարբեր ծայրերից, ԱՄՆ-ում էին եւ իրենց աջակցության մասին են հայտարարել բազմաթիվ քաղաքական, մշակութային գործիչներ, հոգեւորականներ, գործարարեր, կազմակերպություններ ու անհատներ: Հիշեցնենք՝ նախորդ տարի՝ Հեռուստամարաթոն 2017-ին, հանգանակվել էր 12.5 միլիոն դոլար: Այս տարվա «Արարենք միասին» խորագրով հեռուստամարաթոնի միջոցներով կշարունակվեն Արցախում իրագործվող երկու կարեւոր ծրագրեր, որոնք սկսվել էին նախորդ տարվա՝ «Բերքառատ Արցախ» խորագրով հեռուստամարաթոնի միջոցներով: Լոս Անջելեսից հատուկ Էպիկենտրոնի համար հաղորդում է Արամ Արարատյանը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv