Հարձակում լրագրողների վրա: Այսօր Արարատի մարզի Հովտաշատ գյուղում վեց տասնյակից ավելի քաղաքացիներ ապօրինի ներխուժել են «Մուլտի գրուպ» կոնցեռնի գլխավոր տնօրեն Սեդրակ Առուստամյանին պատկանող տարածք և փորձել են հակաօրինական վարքագիծ դրսևորել: Ահազանգ ստանալով, որ գյուղի բնակիչները փորձում են ապօրինի գործողություններ կատարել՝ «Էպիկենտրոնի» նկարահանող խումբը մեկնել է դեպքի վայր: Դեռ տարածք չհասած` 60-ից ավելի քաղաքացիներ, հայհոյախառն արտահայտություններ և սպառնալիքներ հնչեցնելով, հարձակվել են «Էպիկենտրոնի» նկարահանող խմբի վրա՝ թույլ չտալով իրականացնել նկարահանումներ, հարվածելով լրագրողին և վնասելով տեսախցիկը: Փաստի առնչությամբ Սեդրակ Առուստամյանի և «Կենտրոն» հեռուստաընկերության ներկայացուցիչները հաղորդում են ներկայացրել ոստիկանություն:

«Մեկ տարի անց մենք ունենք չիրականացված խոստումներ»,- 2019 թվականն այսպես է ամփոփել ՀՀԿ մամուլի խոսնակ էդուարդ Շարմազանովը: Ըստ նրա՝ Հանրապետությունում ոչ միայն չկա ներգաղթ, այլև, ըստ պաշտոնական տվյալների, շուրջ 12.000 մարդ լքել է Հայաստանը: «Չկան ներդրումներ, չկա որևէ տնտեսական լուրջ հեղափոխություն, ինչի մասին խոսում էր Փաշինյանը»,- նշել է Շարմազանովը:

Մայրաքաղաք Երևանում վերջին մեկ տարում տեղի ունեցած թե՛ դրական, թե՛ բացասական փոփոխությունները գնահատել են երևանցիները: «Գելլափ»-ի հերթական հարցմանը մասնակցել է 601 քաղաքացի: Ամենակարևոր ձեռքբերումը հարցված երևանցիների համար աղբահանության խնդրի կարգավորումն է, իսկ ամենաառաջնահերթ լուծում պահանջում է հասարակական տրանսպորտը: Ավագանու «Լույս» խմբակցության ղեկավար Դավիթ Խաժակյանն էլ նշել է, որ առաջիկայում նոր՝ աղմկահարույց բացահայտումներով է հանդես գալու:

«Ռուսաստանի Դաշնությունը շատ զգույշ է վերաբերվում Հայաստանի ներքին գործընթացներին»,- այսօր հրավիրած տարեվերջյան ասուլիսին ասել է Հայաստանում Ռուսաստանի դեսպան Սերգեյ Կոպիրկինը: «Կարևոր է, որ Հայաստանում իրավիճակը լինի խաղաղ, կայուն, որպեսզի քաղաքական, հասարակական ուժերն առավելագույն կոնսենսուսի հասնեն: Մոսկվայի համար առանցքային է դաշնակցային հարաբերությունների պահպանումը, ամրապնդումն ու զարգացումը»,- նշել է Կոպիրկինը: Դեսպանն անդրադարձել է նաև Հայաստանում քրեական գործերով անցնող մի խումբ նախկին պաշտոնյաների՝ Ռուսաստանում գտնվելու հանգամանքին: «Դա ոչ թե քաղաքական, այլ իրավական տիրույթում գտնվող հարց է»,- նկատել է ռուս դիվանագետը:

Դիլիջանի բժշկական կենտրոնը վերակառուցվել է, հիմնովին նորոգվել և վերազինվել ժամանակակից սարքավորումներով։ Ծրագիրն իրականացրել է Հարություն Քուշկյանը՝ ներդնելով ավելի քան 2.4 մլն դոլար: Բժշկական կենտրոնը սպասարկում է Դիլիջանի և հարակից 6 համայնքների շուրջ 20-25 հազար բնակչությանը: Բուժհաստատությունն ունի 175 աշխատակից, որից 30-ը՝ բժիշկ: Անհրաժեշտության դեպքում իրականացվում են Երևանից ևս 35 բժշկի պարբերական այցելություններ: Հիվանդանոցի հնարավորություններին ծանոթացել է նաև Հանրապետության վարչապետը: