Ավտովարորդները դիմել են վարչապետին՝ աջ ղեկով մեքենաների ներկրման արգելքը վերացնելու պահանջով: Իրավաբանների և հոգեբանների միջազգային ասոցիացիայի նախագահ Խաչատուր Մարոզյանի համոզմամբ՝ որոշումը կայացվել է կեղծ հիմքով: Իրականում աջ ղեկով ավտոմեքենաների մասնակցությամբ ճանապարատրասպորտային ավտովթարների թիվը ընդհանուր վիճակագրության մեջ փոքր է: Իսկ այս արգելքով պայմանավորված՝ հիմա Հայաստան էժան և որակով մեքենաներ ներկրելու հնարավրություն գրեթե չկա:
Նիկոլ Փաշինյանն այցելել է ՄԱԿ-ում ՀՀ մշտական ներկայացուցչություն և Նյու Յորքում գտնվող Հայ Առաքելական եկեղեցու Սուրբ Վարդան մայր տաճար։ԵԱՀԿ Մինսկի խմբի համանախագահներ Իգոր Պոպովի, Ստեֆան Վիսկոնտիի, Էնդրյու Շոֆերի միջնորդությամբ էլ երեկ Նյու Յորքում տեղի է ունեցել Հայաստանի արտգործնախարար Զոհրաբ Մնացականյանի և Ադրբեջանի արտգործնախարար Էլմար Մամեդյարովի հանդիպումը: Հայաստանի արտաքին քաղաքական գերատեսության ղեկավարը վերահաստատել է ԼՂ հակամարտության բացառապես խաղաղ կարգավորման վերաբերյալ Հայաստանի դիրքորոշումն ու մոտեցումները։Զոհրաբ Մնացականյանը մասնակցել է նաև ՀԱՊԿ անդամ պետությունների արտաքին գործերի նախարարների հանդիպմանը:
Կառավարությունը հերթական նիստում հավանություն է տվել 2019 թվականի պետական բյուջեի մասին օրենքի նախագծին: Ֆինանսների նախարար Ատոմ Ջանջուղազյանի գնահատմամբ, այս բյուջեի առանձնահատկությունն այն է, որ 2019 թվականից պետական բյուջեն պետք է ծրագրային ձևաչափով ներկայացված լինի օրենքում, ինչը նշանակում է, որ ֆինանսական միջոցները, որոնք օգտագործվում են բյուջեի շրջանակում, ըստ էության, մղվում են երկրորդային պլան: «Կարևոր են համարվում արդյունքային ցուցանիշները, այն միջոցառումները, որոնք նախատեսվում է իրականացնել այդ արդյունքերին հասնելու համար»,-նշել է ֆինանսների նախարարը: Կառավարության մեկ այլ որոշմամբ քրեակատարողական հիմնարկներին կտրամադրի 32 միլիոն դրամ՝տեխնիկա գնելու և վերանորոգման աշխատանքների համար:
Ամենայն հայոց բանաստեղծի՝ Հովհաննես Թումանյանի 150-ամյա հոբելյանին նվիրված միջոցառումները պետք է անցկացվեն ամենաբարձր մակարդակով. այս մասին Գագիկ Ծառուկյանը հայտարարել էր Դսեղ կատարած այցելության ընթացքում: ԲՀԿ առաջնորդը մեծ լոռեցու ծննդավայրում նշել էր, որ կօգնի վերականգնել Հաղպատի վանական համալիրը, Հովհաննես Թումանյանի տուն-թանգարանն ու Դսեղի սպորտային դահլիճը: Խոստումից անմիջապես հետո Գագիկ Ծառուկյանի հանձնարարությամբ՝ աշխատանքային խումբ է մեկնել Լոռու մարզ՝ ուսումնասիրելու խնդիրներներն ու գնահատելու աշխատանքների ծավալը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv