Հոկտեմբերի 31-ը խնայողությունների միջազգային օրն է: Այն կոչված է ամբողջ աշխարհում խթանելու ֆինանսական խնայողություններ կատարելու գործընթացը: Խնայողությունների պահպանման կարևոր միջոց են համարվում ավանդները:«Հայաստանում վերջին տասը տարիների ընթացքում ֆիզիկական անձանց խնայողություններն աճել են տարեկան միջինը 19 տոկոսով՝ տարբեր ավանդատեսակների գծով»,-խնայողության միջազգային օրվան նվիրված համաժողովում նշել է կենտրոնական բանկի խորհրդի անդամ Արմենակ Դարբինյանը: Դա պայմանավորված է բանկային համակարգի կայունությամբ և բնակչության վստահությամբ:

ՊԵԿ մաքսանենգության դեմ պայքարի վարչության պետը ներկայացրել է վերջին տասն ամիսներին ապօրինությունների դեպքերը: 126 խախտում է եղել, որոնցից 70-ով հարուցվել է քրեական գործ: Հիմնականում մաքսանենգները փորձել են ներկրել ու արտահանել թմրամիջոց: Ամենաուշագրավը սոցցանցերում թմրանյութերի վաճառքով զբաղվող խմբի հայտնաբերումն էր, որը կառավարվել է երկրորդ երկրից: Մաքսանենգության դեմ պայքարի վարչության պետը խոսել է նաև աննախադեպ մի երևույթի մասին, երբ ներկրվել է ապօրինի զենք-զինամթերք:

Ազգային Ժողովն այսօր միաձայն՝ 71 կողմ ձայնով, առաջին ընթերցմամբ ընդունել է Համաներման մասին օրենքի նախագիծը, որից կօգտվի մոտ 6500 անձ: Առաջինից երկրորդ ընթերցման փուլում Ծառուկյան խմբակցությունը հանդես կգա փոփոխությունների առաջարկով: Կառավարությունը ներկայացված համաներման նախագիծը համարում է աննախադեպ, սակայն ինչպես պատգամավորներից ոմանք են նկատել՝ դատապարտյալների շատ հարազատներ երկրում տեղի ունեցած հեղափոխությունից հետո ակնկալում էին շատ ավելի լայն մասշտաբի համաներում: Նիստի մանրամասները Ահարոն Հայրապետյանն է ներկայացնում: