Հայաստանի կառավարության՝ կորոնավիրուսի տնտեսական հետևանքների չեզոքացման միջոցառումների շրջանակում արդեն ավելի քան 120 փոքր ու միջին ձեռնարկություն է դիմել աջակցություն ստանալու համար, տեղեկացրել է էկոնոմիկայի նախարարը: Առաջիկայում դիմումներին կարձագանքեն: Տիգրան Խաչատրյանը նշել է, որ Հայաստանում տնտեսական արդյունքի կրճատումը, տարեսկզբի կանխատեսումների համեմատ, էական կլինի, սակայն, վստահություն է հայտնել, որ տնտեսությունն ի վիճակի է արագ վերականգնել պոտենցիալը:
Կորոնավիրուսի կանխարգելման միջոցառումների շրջանակում, Պարետի հրամանով, ապրիլի 1-12-ը սահմանափակվել է քաղաքացիների տեղաշարժը մարզերից դեպի քաղաք և հակառակ ուղղությամբ: Մեր նկարահանող խումբն այսօր շրջել է Երևանի փողոցներով, զրուցել քաղաքացիներին հետ, ծանոթացել մայրաքաղաքին մոտ անցակետերում տիրող իրավիճակին:
Վերջերս մի քանի խոշոր սուպերմարկետների աշխատանքը, պարետատան որոշմամբ, վեց ժամով դադարեցվել էր: Առողջապահական ու աշխատանքի տեսչական մարմնի ղեկավարն ասում է՝ մոտ տասն օրվա ընթացքում գրեթե 260 տնտեսվարողի են ստուգել ու դրանցից 38-ում խախտումներ հայտնաբերել: Խանութները չեն հետևել պարետատան պահանջներին, ինչի համար էլ դադարեցվել է նրանց տնտեսական գործունեությունը: Ստուգումները շարունակվում են նաև սահմանային հսկիչ կետերում:
«Գագիկ Ծառուկյան» բարեգործական հիմնադրամը շարունակում է կանխարգելիչ աշխատանքները Կոտայքի մարզի Աբովյան քաղաքում: Տեխնիկական նորագույն միջոցներով զինված աշխատակիցներն ամեն օր ախտահանում են փողոցները, մայթերը, բակերն ու շքամուտքերը: Կանխարգելիչ միջոցառումներ են իրականացվում նաև կանգառներում, ստորգետնյա անցումներում և քաղաքի բանուկ հատվածներում:
«Գագիկ Ծառուկյան» բարեգործական հիմնադրամը, հաշվի առնելով երկրում արտակարգ դրությամբ պայմանավորված խստացված սահմանափակումները, շարունակում է իր տեսադաշտում պահել սոցիալական խնդիրներ ունեցող քաղաքացիներին: Հիմնադրամի մեծածավալ աջակցությունը կրկին Գեղարքունիքում էր: Մարզի քաղաքների և գյուղերի 1000-ից ավելի սոցիալապես անապահով ընտանիքներ ստացել են առաջնային անհրաժեշտության սննդամթերք:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv