Կառավարության նիստին վարչապետ Կարեն Կարապետյանը նախքան օրակարգի հարցերի քննարկումը՝ տվել է մի քանի հանձնարարական: Կառավարությունը որոշել է 100 տոկոս պետական մասնակցությամբ «Նաիրիտ-2» ընկերությանը սեփականության իրավունքով պատկանող շենք-շինությունները ուղղակի վաճառքի ձևով օտարել «Ա-Ս ինվեսթմենթս» ընկերությանը: Ընկերությունը պատրաստակամություն է հայտնել ձեռք բերել գույքային համալիրը և այն օգտագործել արդյունաբերական և այլ գործարար նպատակների համար: Ընկերությունը ծրագրի իրականացման համար մոտակա 7-10 տարվա ընթացքում նախատեսում է ներդնել 7,5 միլիարդ դրամ և նախնական հաշվարկներով ստեղծել 250 նոր աշխատատեղ:

Ալեքսանդր Սպենդիարյանի անվան օպերայի և բալետի ազգային ակադեմիական թատրոնում տեղի է ունեցել Հայկյան մրցանակաբաշխությունը: 2001թ-ից անցկացվող ամենամյա մրցանակաբաշխության նպատակն է բացահայտել և գնահատել այն անհատներին, կառույցներին, որոնք 2017 թվականին մասնակցություն են ունեցել երիտասարդական տարբեր նախաձեռնություններին ու նշանակալից հաջողություն են արձանագրել։ Հայկյան հատուկ մրցանակները երիտասարդներին է շնորհել հանրապետության նախագահ Սերժ Սարգսյանը:

Եթե ընտրվեմ, իմ ամբողջ եռանդը և երկար տարիների փորձը ծառայեցնելու եմ մեր երկրի, Արցախի և Սփյուռքի խնդիրների լուծմանը,- այսօր Խորհրդարանում հայտարարել է Հայաստանի 4-րդ նախագահի թեկնածու Արմեն Սարգսյանը: Արմեն Սարգսյանին նախագահի թեկնածուի պաշտոնում են առաջադրել ՀՀԿ և ՀՅԴ խմբակցությունների 65 պատգամավորները: Իսկ ԱԺ նիստն առավոտյան մեկնարկել էր մեկ րոպե լռությամբ ի հիշատակ 2008 թվականի մարտի մեկին Երևանում տեղի ունեցած ողբերգական իրադարձության հետևանքով զոհված 10 անձանց: Նիստի ընթացքում մեծամասնությունը դեմ է քվեարկել Ծառուկյան խմբակցության նախագծին՝ հարկային օրենսգրքի փոփոխության վերաբերյալ: