Միջպետական փակ ճանապարհ և փակ համայնքապետարան: Շիրակի մարզի 17 համայնքի բնակիչները պահանջում են համայնքի ղեկավարի հրաժարականը: Նրանք փակել են Մարալիկ քաղաքում գտնվող Անի համայնքապետարանը և արդեն չորս օր է համայնքի ղեկավարին, համայնքապետարանի աշխատակիցներին և ավագանու անդամների թույլ չեն տալիս մուտք գործել համայնքապետարանի շենք: Ի պաշտպանություն համայնքի ղեկավարի, նրա կողմակիցները փակել են Երևան-Գյումրի միջպետական ճանապարհը՝ պահանջելով բացել համայնքապետարանը: Երկու ճամբարի բաժանված համայնքների բնակիչները վճռական են տրամադրված: Որն է ստեղծված վիճակի հանգուցալուծումը և դեռ որքան ժամանակ պետք է փակված մնան միջպետական ճանապարհն ու 17 համայնքերի խնդիրներով զբաղվող համայնքապետարանը:
Ֆրանկոֆոնիայի գագաթաժողովի օրերը՝ հոկտեմբերի 11-12-ը կլինեն ոչ աշխատանքային՝ փոխարինելով դրանք հաջորդող շաբաթ օրերով: Կառավարությունը հավանություն է տվել ՀՀ-ան տոների և հիշատակի օրերի մասին օրենքում լրացում կատարելու նախագծին: Այս օրակարգով գործադիրն առաջարկել է վաղը գումարել Ազգային ժողովի արտահերթ նիստ: Նիստում դռնփակ ռեժիմով քննարկվել է նաև համաներում հայտարարելու մասին որոշման նախագիծը: Այն մենք կքննարկենք դռփակ ռեժիմով, որովհետև օրենքը նախատեսում է, որ Ազգային ժողովի հանձնաժողովի նիստում քննարկումը պետք է լինի դռնփակ: Տրամաբանական չի լինի, եթե կառավարության նիստում դռնբաց քննարկվի, հետո ԱԺ հանձնաժողովի նիստում՝ դռնփակ,-ասել է Նիկոլ Փաշինյանը:
Պետական բյուջեն պետք է լինի հավասակշռված և չպետք է տանի արկածախնդրության. 2019 թվականի պետական բյուջեի նախագիծը ներկայացնելիս հայտարարել է Ֆինանսների նախարարը: Ատոմ Ջանջուղազյանի խոսքով՝ 2019-ի բյուջեի ծախսերի կառուցվածքում շատ բան չի փոխվել: Տեսակարար մեծ կշիռ ունեն պաշտպանության ոլորտի ծախսերը: Նախարարը հայտնել է, որ 2019 թ. պետբյուջեի նախագծում 20 միլիարդ դրամով ավելացել են կենսաթոշակային հատկացումները։
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv