Ակցիաներ են տեղի ունեցել նաև մեր երկրում ԱՄՆ դեսպանատան և Եվրամիության գրասենյակի դիմաց: Բողոքավորները ահազանգել են, որ Հայաստանն այսօր Արցախի հետ միասին կռիվ է տալիս ահաբեկչական Թուրքիայի, Ադրբեջանի և վարձկանների դեմ, և միջազգային հանրությունն իրավունք չունի անտարբեր նայել այս ամենին: Դեսպանատան պաշտոնյան խոստացել է ցուցարարների պահանջների հիման վրա համառոտ զեկույց կազմել և ուղարկել Վաշինգտոն: Իսկ Եվրամիության գրասենյակում ցուցարարներին չեն ընդունել:
Ռուսաստանի ԱԳ նախարարը հույս ունի առաջիկա օրերին համաձայնեցված տեսնել Լեռնային Ղարաբաղի հակամարտության գոտում հրադադարի ռեժիմի պահպանման վերահսկողական մեխանիզմները: «Մոսկվայում Հայաստանի և Ադրբեջանի ներկայացուցիչների հանդիպումից հետո հույսերը չարդարացան, Ղարաբաղում մարտերը շարունակվեցին, դա անընդունելի է»,- ասել է Սերգեյ Լավրովը: Նրա խոսքով՝ հակամարտության կողմերին պետք է դրդել համաձայնեցնել այն դրույթները, որոնք թույլ կտան կայունացնել իրավիճակը:
ԱԺ ԲՀԿ խմբակցության պատգամավորները կոշտ քննադատության են արժանացրել ԵՄ-ի հայտարարությունը, որով միջազգային հեղինակավոր կառույցը դատապարտել էր հայկական կողմի գործողությունները Գյանջայի ուղղությամբ: Պատգամավորներն արձանագրել են, որ միջազգային հանրությունը կողմնակալ վերաբերմունք է դրսևորել: Տեղի ունեցածը որակելով զարհուրելի՝ Նաիրա Զոհրաբյանը դիմել է միջազգային հանրությանը՝ «կա՛մ դուք սթափվում եք, կա՛մ ձեզ վրա պետք է դնել մեծ տապանաքար»:
Ադրբեջանը շարունակում է սահմանային իրավիճակը լարված պահել: «Հարավային ուղղությամբ ծանր մարտերը շարունակվում են. յուրային ստորաբաժանումները «մաշում են» հակառակորդին»,- հայտնել է ՊՆ մամուլի խոսնակը: Շուշան Ստեփանյանը նաև հերքել է Բաքվի հերթական սուտն այն մասին, թե, իբր, Հայաստանը թիրախավորել է Բաքու-Նովոռոսիյսկ նավթամուղը: Հոկտեմբերի 18-ի լույս 19-ի գիշերը մղված մարտերին զուգահեռ՝ Ադրբեջանը կրակ է բացել Արցախի խաղաղ բնակավայրերի ուղղությամբ, Ստեփանակերտում չորս պայթյունի ձայն է լսվել:
Հայաստանն Ադրբեջանի նկատմամբ կիրառված միջանկյալ միջոցի շրջանակն ընդլայնելու պահանջով դիմել է ՄԻԵԴ: Այս պահանջի համար հիմք են հանդիսացել բազմաթիվ տեսանյութերը, որոնցում հստակ երևում են ռազմագերիների կամայական գնդակահարությունների, դիակների նկատմամբ վատ վերաբերմունքի, գլխատումների և այլ դրվագներ: Բացի այդ, ադրբեջանական վայրագությունների փաստերով հարուցվել են բազմաթիվ քրեական գործեր: Հայտնի է դարձել, որ Ադրբեջանի ԶՈւ–ն ստիպել է վարձկաններին կրել ադրբեջանական համազգեստ։
Այսօր կրկին բողոքի բազմամարդ ցույց է կազմակերպվել Հայաստանում ՄԱԿ-ի գրասենյակի դիմաց: Այնտեղ հավաքված արցախցի կանայք պահանջում են, որ միջազգային հանրությունը չլռի և արձագանքի Արցախում կատարվող վայրագություններին: Հավաքվածները վանկարկել են «Կանգնեցրե՛ք ադրբեջանական ագրեսիան», «Մի՛ եղեք կույր», «Ճանաչում»: Ավելի ուշ նրանց երթով միացել են Մատենադարանի դիմաց հավաքված քաղաքացիները, որոնք նամակ են պատրաստել միջազգային կառույցին հանձնելու համար:
«Բարգավաճ Հայաստան» կուսակցության նախագահ Գագիկ Ծառուկյանի խափանման միջոց կալանքը գրավով փոխարինելու վերաբերյալ նրա պաշտպանների ներկայացրած միջնորդության քննությունն այսօր հետաձգվել է: Նիստը նախագահել է դատավոր Մնացական Մարտիրոսյանը: Գագիկ Ծառուկյանի պաշտպան Երեմ Սարգսյանն ասել է, որ նիստի հետաձգման պատճառն այն է, որ դատարանն իրենցից որոշակի փաստաթղթեր է պահանջել: Փաստաբանի խոսքով՝ դատարանը պետք է հաշվի առնի նաև հանրային շահը: «Եթե հիմա դրսում հարցում անեն, թե Ծառուկյանին պետք է ազա՞տ արձակեն, ապա 99 տոկոսը կասի` այո՛»,- նշել է Սարգսյանը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv