Նիկոլ Փաշինյանն այսօր աշխատանքային այցով եղել է Վանաձորում: Վարչապետի պաշտոնակատարը պատասխանել է լրագրողների հարցերին, որոնք վերաբերել են երկրի ինչպես ներքին, այնպես էլ արտաքին օրակարգին: Փաշինյանը հայտնել է, որ իր համար անակնկալ է եղել Մանվել Գրիգորյանին գրավի դիմաց ազատ արձակելու դատարանի որոշումը: Վարչապետի պաշտոնակատարն անդրադարձել է նաև կառավարման համակարգում սպասվող օպտիմալացմանը, շեշտել՝ «Իմ քայլը» դաշինքը նախընտրական քարոզարշավի ընթացքում բազմիցս հանդես է եկել պետական կառավարման համակարգում օպտիմալացման մասին հայտարարություններով և ստացել ժողովրդի մանդատն այն իրականացնելու համար:

Եվրասիական փորձագիտական ակումբը գումարել է 5-րդ ամենամյա ժողովը, որին մասնակցել են Հայաստանում ԵԱՏՄ անդամ երկրների դիվանագիտական պատվիրակությունների ղեկավարներ ու ներկայցուցիչներ, Հայաստանի ԱԺ պատգամավորներ, գիտնականներ, փորձագետներ: Գիտաժողովին ներկայացվել են ԵԱՏՄ-ին Հայաստանի մասնակցության 4 տարվան, եվրասիական ինտեգրման իրողություններին ու հեռանկարներին վերաբերող զեկույցներ: Եվրասիական փորձագիտական ակումբի անդամի կոչում է շնորհվել ԱԺ պատգամավոր, ԲՀԿ նախագահ Գագիկ Ծառուկյանի մամուլի խոսնակ Իվետա Տոնոյանին:

Սահմանամերձ համայնքների, անապահով ընտանիքների, Արցախի ազատամարտի ու ապրիլյան քառօրյայի մասանկիցների երեխաներին տոնական անակնկալ է մատուցել վարչապետի պաշտոնակատարի տիկին Աննա Հակոբյանը: Նրա հրավերով՝ 800 երեխաներ մայր թատրոնում դիտել են «Սառցե սիրտը» ներկայացումը: Աննա Հակոբյանը ևս դիտել է ներկայացումը՝ դստեր Արփիի հետ: Օրվա երկրորդ կեսին արդեն փոքրիկները վարչապետի պաշտոնակատարի տիկնոջ հետ այցելել են ժամանցի կենտրոններ:

Հայաստանի երկրորդ նախագահի պաշտպանների խումբն առաջիկայում Քոչարյանի գործը կուղարկի Մարդու իրավունքների եվրոպական դատարան: Պաշտպաններից Հայկ Ալումյանն ասել է, որ դիմումին պետք է կցվեն Նիկոլ Փաշինյանի, Ազգային անվտանգության ծառայության տնօրենի եւ Հատուկ քննչական ծառայության պետի գաղտնալսված եւ հրապարակված հեռախոսազրույցների ձայնագրությունները: Ալումյանի կարծիքով` Քոչարյանի դատավարության ամբողջ ընթացքը և դատավորի ընտրությունը եղել են խախտումներով, իսկ մարտի 1-ի իրադարձություններն ու դրան նախորդող օրերին արձակված 0038 հրամանն իրար հետ կապ չեն ունեցել: Պաշտպանն ասել է նաև, որ Ռոբերտ Քոչարյանն այդ հրամանից տեղյակ չի եղել:

Էջմիածնում կրքերը կրկին թեժացել են: Քաղաքի բնակիչները երեկ գիշերվանից բողոքի ակցիա են իրականացնում՝ պահանջելով, որ գրավի դիմաց ազատ արձակված Մանվել Գրիգորյանը կրկին կալանավորվի և զրկվի գեներալի կոչումից: Ակցիայի մասնակիցներն առավոտից փակել են Երևան-Էջմիածին ճանապարհը: Նրանք պնդում են, որ բողոքի ակցիաները շարունակելու են այնքան ժամանակ, մինչև Մանվել Գրիգորյանի նկատմամբ խափանման միջոց կրկին ընտրվի կալանքը: Էջմիածնում ընթացող զարգացումներին հետևել է «Էպիկենտրոնի» նկարահանող խումբը: