Կենդանասերներն արձագանքել են ԱԱԾ պետ Արթուր Վանեցյանի կես կատակ կես լուրջ արած կենդանիների փրկության կոչին: ԱԱԾ պետը հայտարարել էր, որ անգամ պահեստներում պահվող սնունդը առգրավելուց հետո կենդանիները սոված են: Երևանի կենդանաբանական այգու տնօրենը և աշխատակիցները Վայրի բնության և մշակութային արժեքների պահպանման հիմնադրամի նախաձեռնությամաբ այցելել են ԱԺ պատգամավոր Մանվել Գրիգորյանին պատկանող տարածքում պահվող վայրի կենդանիներին: Գեներալին պատկանող տարածքում պահվում է մեկ վագր, 5 արջ, ջայլամներ, այծեր: Կենդանիներին ուսումնասիրելուց հետո կենդանաբանական այգու մասնագիտական անձնակազմը վագրին քնեցրել են և տեղախոխել կենդանաբանական այգու կարանտինային մաս: Արջերը և մյուս կենդանիներն անվտանգ տարածք կտեղափոխվեն վաղը:
Հայաստանի Հանրապետության քաղաքացիները՝ շարքայինից մինչև ամենաբարձրաստիճան պաշտոնյա շարունակում են ցնցված մնալ տեսածից ու լսածից: Մինչև հանրությունն ապշահար քննարկում է ԱԱԾ տեսանյութի սկանդալ առաջացրած կադրերն ու փորձում հասկանալ, թե ինչպես կարող էր սահմանը պահող զինվորի բաժինը հայտնվել գեներալի կենդանիների ստամոքսում, դատախազն ԱԺ պատգամավորին անձեռնմխելիությունից զրկելու միջնորդություն է ներկայացրել: Արթուր Դավթյանը դիմել է վարչապետին՝ կառավարության նախաձեռնությամբ Ազգային ժողովի արտահերթ նիստ գումարելու համար: Այն տեղի կունենա վաղը: Իսկ մինչև այդ կառավարությունն է արտահերթ նիստ անցկացրել: <<ԱԺ պատգամավոր, <<Երկրապահ>> կամավորական միության նախահահ Մանվել Գրիգորյանի հետ կապված կոռուպցիոն գործն ամենամեծամասշտաբն է Հայաստանի երրորդ հանրապետության պատմության մեջ: Մեր իրավական համակարգի համար որևէ գործի քննության ճանապարհին որևէ խոչընդոտ չկա>>,-ասել է Նիկոլ Փաշինյանը:
Խորհրդարանում պատգամավորների ճեպազրույցի միակ թեման եղել է Մանվել Գրիգորյանին վերաբերող սկանդալը: Բոլոր խմբակցությունները դատապարտել են գեներալ-պատգամավորի արարքն ու այն որակել թալան: <<Հանրապետական կուսակցությունը քաղաքական պատասխանատվություն չի կրում Մանվել Գրիգորյանի արարքների համար>>,- հայտարարել է ԱԺ փոխնախագահ Էդուարդ Շարմազանովը: <<Ծառուկյան>>, ԵԼՔ եւ ՀՅԴ խմբակցությունները պահանջել են օրենքի ամբողջ խստությամբ պատժել բոլոր մեղավորներին: