Չումբո նախաձեռնությունը չպետք է որեւէ կապ ունենա դպրոցական միջոցառումների հետ,- պահանջում են կրթության մասնագետները: Նրանց համոզմամբ նախաձեռնող խումբը վտանգ է ներկայացնում երեխաների կյանքի համար: Աղմկահարույց տեսանյութը, որտեղ Կրթության եւ գիտության փոխնախարարը շնորհակալություն է հայտնում Չումբոյին, մտահոգել է նաեւ նախարար Լեւոն Մկրտչյանին: Կրթության եւ գիտության նախարարության հանրակրթության վարչության պետ Աշոտ Արշակյանը հավաստիացրել է, որ Չումբոյի հետ չեն գործակցել: Նախաձեռնությունը հայտարարել է, որ դպրոցների համար միլիոնավոր դոլարների հասնող բարեգործական նախաձեռնություն է իրականացրել: Մասնագետները կասկածի տակ են առել Չումբոյի հայտարարությունը եւ պահանջում են ուսումնասիրել նախաձեռնության արած ծախսը:

Կառավարությունը  հավանություն է տվել «Երևանի պետական համալսարանի շրջանավարտների միավորում» ՀԿ-ի ներկայացրած` Երևանի Մոնթե Մելքոնյան փողոցին հարակից  6,57 հա մակերեսով հողամասում իրականացվելիք բնակարանային ապահովության սոցիալական-ներդրումային ծրագրին: Այնտեղ կկառուցվի «Վերածնունդ» երիտասարդական ավանը: Մինչև օրակարգին անցնելը, վարչապետը  ոռոգման շրջանի նախապատրաստական աշխատանքի վերաբերյալ հանձնարարականներ է տվել:

«Բարգավաճ Հայաստան» կուսակցության Կանանց խորհուրդն ընդլայնված կազմով նիստ է անցկացրել: Օրակարգի գլխավոր հարցը եղել է ղեկավար կազմի ընտրությունը: Խորհուրդը միաձայն և բուռն ծափողջյուններով պատվավոր նախագահ է վերընտրել Ռոզա Ծառուկյանին: ԱԺ «Ծառուկյան» խմբակցության պատգամավորներ Նաիրա Զոհրաբյանը, Իվետա Տոնոյանը և Լուիզա Սարգսյանն ընտրվել են խորհրդի համանախագահներ: Ռոզա Ծառուկյանը հայտարարել է, որ ԲՀԿ կանանց խորհուրդը վերսկսելու է ակտիվ գործունեությունը: Առաջին քայլերից մեկը լինելու է հանձնաժողովների ստեղծումն ու կանանց խորհրդի տարածքային կառույցների ընդլայնումը: Երևանից բացի ամենօրյա ակտիվ աշխատանք է տարվելու նաև մարզերում: