ԱԱԾ-ից Գագիկ Ծառուկյանի դուրս գալուց հետո ոստիկանները անցել են ագրեսիվ գործողությունների՝ բիրտ ուժ կիրառելով ոչ միայն ԲՀԿ նախագահի համակիրների, այլև այնտեղ գտնվող բազմաթիվ լրագողների և օպերատորների հանդեպ: Իրավիճակը թեժացել է հատկապես այն բանից հետո, երբ ոստիկանները սկսել են քաշքշել իրենց մասնագիտական գործունեությունն իրականցնող մեր գործընկերներին՝ այդ թվում նաև «Էպիկենտրոն»-ի նկարահանող խմբերին: Այդ ընթացքում ոստիկանները հորդորել են լրագրողներին ու ԲՀԿ նախագահի համակիրներին ազատել ճանապարհի երթևեկելի հատվածը, միաժամանակ,սակայն, սկսել անսպասելի գործողություններ՝ օղակի մեջ առնելով լրատվամիջոցների ներկայացուցիչներին: Բիրտ ուժ է կիրառվել նաև Ծառուկյանի աջակիցների և Երևանի ավագանու ԲՀԿ խմբակցության անդամների նկատմամբ: Ոստիկանական գործողության հետևանքով վնասվածքներ է ստացել մի քանի լրագրող, վնասվել են տեսախցիկներ, կորել է նաև PARA.TV-ի ուղիղ հեռարձակման սարքը:
Այսօր խորհրդարանում «Բարգավաճ Հայաստան» խմբակցության պատգամավորները հանդես են եկել ելույթներով: ԲՀԿ ներկայացուցիչներն արձանագրել են, որ իշխանություններն ընտրել են ինքնախաբեության ուղին, իշխանությունը և նրա ներկայացուցիչները օգտվում են մանիպուլյացիոն խողովակների անազնիվ մեթոդներից: Խմբակցության պատգամավորները հիշեցրել են, որ նախաքննության գաղտնիք հանդիսացող փաստաթուղթը հայտնվել է իշխանական պատգամավորների, նախարարների ֆեյսբուքյան պատերին, որոնք, միմյանց հերթ չտալով, հրապարակել են այն, մինչդեռ փաստաթուղթը չի տրամադրվում Գագիկ Ծառուկյանի փաստաբանական խմբին:
Առավոտից ստացվում են ահազանգեր այն մասին, որ մարզերից Երևան եկող ճանապարհները գտնվում են ոստիկանության վերահսկողության ներքո և քաղաքացիներին թույլ չեն տալիս գալ Երևան: Բացի այդ ԲՀԿ նախագահ Գագիկ Ծառուկյանին աջակցող բազմաթիվ քաղաքացիներ մայրաքաղաքի տարբեր հատվածներում փողոցներ են փակել ՝ իրենց դժգոհությունը հայտնելով իրավապահ մարմինների գործողությունների նկատամամբ: