Չնայած ընդդիմության կոշտ քննադատությանը՝ Հարկային օրենսգիրքն 1-ին ընթերցմամբ ընդունվեց
Խորհրդարանն այսօր արտահերթ նիստում քննարկել և ընդունել է Հարկային օրենսգրքում փոփոխություններ կատարելու մասին նախագծերի փաթեթը: Ֆինանսների փոխնախարար Արման Պողոսյանը ներկայացրել է ավելացված արժեքի հարկի ու եկամտահարկի համահարթ հարկման մասին առաջարկվող դրույթները: ԲՀԿ-ն հայտարարել է, որ դեմ է քվեարկելու նախագծին, քանի որ որոշ դրույթների հետ համաձայն չեն: «Լուսավոր Հայաստանն» էլ կարծում է, որ նախագիծը շատ ուշացած է, և կառավարության այս տեմպը չի կարող տնտեսության զարգացման բերել:
Գործու՞մ է արդյոք կոռուպցիոն սխեմա ավտոմաքսատանը
Կոռուպցիոն սխեմա՝ ավտոմաքսատան գործունեության ընթացքում: Իրավապաշտպան Արա Խաչատրյանը պնդում է, որ որոշ դեպքերում ավտոմեքենաների մաքսազերծման ժամանակ ոչ իրավաչափ գործողություններ են կատարվում: Նա կոնկրետ դեպք է ներկայացրել: Պետական եկամուտների կոմիտեից պարզաբանել են: Վերջին շրջանում նկատելի է հնարավոր մանիպուլյացիայի նոր մեխանիզմ. քաղաքացիները, թաքցնելով աճուրդից ձեռքբերման փաստաթղթերը, մաքսային մարմիններին ներկայացնում են միջնորդ կազմակերպության տված հաշիվ-ապրանքագիր, որում արտացոլված ապրանքի գինն էականորեն տարբերվում է տվյալ ավտոմեքենայի աճուրդում վաճառքի գնից: Քաղաքացի Արա Խաչատրյանի՝ այսօր ներկայացրած դեպքը նմանատիպ կասկածելի գործարքների շարքից է: ՊԵԿ-ը վստահեցնում է, որ կոռուպցիոն որևէ դրսևորում տեղ չի կարող ունենալ մեր երկրում:
«Տնտեսությունում ստվեր կա և միշտ լինելու է».ՊԵԿ նախագահը՝ Աժ-ում
«Տնտեսության մեջ ստվերը փոքր ու միջին բիզնեսում է, իսկ խոշոր բիզնեսի դեպքում դրա ծավալները չնչին են»-, խորհրդարանում հայտարարել է ՊԵԿ նախագահ Դավիթ Անանյանը: Այսօր ԱԺ մշտական հանձնաժողովների նիստում բյուջեի կատարողականն են ներկայացրել տնտեսական բլոկի ներկայացուցիչները: Անդրադառնալով ներդրումներին՝ Էկոնոմիկայի նախարար Տիգրան Խաչատրյանն ասել է, որ դրանք ոչ թե պակասել են, այլ «պակաս են»: Անդրադառնալով տնտեսվարողների վախերի և ներդրումներից խուսափելու վերաբերյալ հարցին՝ նախարարը պնդել է. ներդրողների մոտ մտահոգություններ չկան, ուղղակի իրերն իրենց անուններով չեն կոչվում:
Կապ ունի՞ «Իմ քայլ»-ի փակ նիստը Զեյնալյանի հրաժարականի հետ
Այսօր հրաժարականներ են ներկայացրել Արդարադատության նախարար Արտակ Զեյնալյանը և Բարձրագույն դատական խորհրդի անդամ Գեւորգ Դանիելյանը, որը Գագիկ Հարությունյանի հրաժարականից հետո ԲԴԽ նախագահի պաշտոնակատարն էր: Զեյնալյանը դիմելով Ֆեյբուքի հետևորդներին գրել է. «Վստահ եմ՝ լավ է լինելու, ... սակայն, եթե լավ չլինի, լինելու է՝ շատ լավ»: ԱԺ իշխող «Իմ քայլը» խմբակցության ղեկավար Լիլիթ Մակունցը լրագրողներին ասել է, որ Արդարադատության նախարարության և Արտակ Զեյնալյանի հետ կապված խմբակցությունում եղել են մտահոգություններ: Ազգային ժողովի նախագահ Արարատ Միրզոյանն էլ հայտարարություն է տարածել՝ նշելով,որ «Իմ քայլը» խմբակցությունը ԲԴԽ անդամի թեկնածու է առաջադրել Գրիգոր Բեքմեզյանին: Իսկ ո՞ւմ անունն է շրջանառվում Արդարադատության նոր նախարարի պաշտոնում:
«Եթե ապացուցվի,որ Մարտի 1-ի հետ կապ եմ ունեցել, թող հրապարակային գնդակահարեն». Գ.Ծառուկյան
ԲՀԿ նախագահ Գագիկ Ծառուկյանն այսօր լրագրողների հետ ճեպազրույցում անդրադարձել է ներքաղաքական մի շարք թեմաների: Լրագրողները հետաքրքրվել են, թե ինչ դիրքորոշում ունի ԲՀԿ նախագահը վարչապետի՝ սևազգեստ մարդկանց մասին հայտարարության, Աբովյանի քաղաքապետի ընտրությունների, Մարտի 1-ի գործի և Հարկային օրենսգրքի վերաբերյալ: Գագիկ Ծառուկյանը ո՛չ հաստատել, և ո՛չ էլ հերքել է Մարտի 1-ի գործով հարցաքննվելու վերաբերյալ տեղեկությունը, ընդգծել՝ այդ օրերի իրադարձությունների հետ որևէ առնչություն չունի: «Եթե ապացուցվի,որ Մարտի 1-ի հետ կապ եմ ունեցել,թող հրապարակային գնդակահարեն»,-վերահասատատել է ԲՀԿ նախագահը:
Նոր մանրամասներ Փաշինյան-Պուտին հանդիպումից. քննարկվել են ռուսական գազի և զենքի հարցերը
«Մենք բավարար «Իսկանդերներ» ունենք, բայց հուսով ենք՝ Ռուսաստանից ինչ-որ բան եւս ստանալ: Ոչ այնքան փոքր բան»,- РИА Новости-ին տված հարցազրույցում ասել է վարչապետ Նիկոլ Փաշինյանը: Նա որոշ մանրամասներ է ներկայացրել Վլադիմիր Պուտինի հետ հանդիպումից, հայտնել, որ Կրեմլի ղեկավարի հետ քննարկել է նաև Հայաստանին մատակարարվող գազի գնի հարցը: Նիկոլ Փաշինյանը Սանկտ Պետերբուրգի միջազգային տնտեսական համաժողովի շրջանակում հանդիպել է նաև Բուլղարիայի նախագահ Ռումեն Ռադևի, Իսրայելի Էկոնոմիկայի նախարարության նորարարության կենտրոնի տնօրեն Ահարոն Ահարոնի և «Յանդեքս» ընկերության ղեկավարության հետ:
Մ. Գրիգորյանի խափանման միջոցը փոխելու պաշտպանական կողմի բողոքի քննությունը հետաձգվեց
Կալանքի տակ գտնվող գեներալ Մանվել Գրիգորյանի պաշտպանները նորից դիմել են Մարդու իրավունքների եվրոպական դատարան։ Պաշտպաններն իրենց բողոքում նշել են, որ Մանվել Գրիգորյանին խոչընդոտում են պատշաճ բուժօգնություն ստանալ և այսպիսով նրան խոշտանգման են ենթարկում։ Այսօր Վերաքննիչ քրեկան դատարանը քննել է Գրիգորյանի խափանման միջոցը փոխելու մասին պաշտպանական կողմի բողոքը: Նիստը հետաձգվել է, քանի որ պաշտպանական կողմը ժամանակ է խնդրել փաստաթղթերի բնօրինակներ ներկայացնելու համար։