Վաղ առավոտից հայկական երկու հանրապետությունների ռազմաքաղաքական գործիչներն ու հոգևոր հայրերը հանդես են գալիս ուղերձներով, միասնության ու համախմբման կոչերով: «Այս արկածախնդրությունը ծանր հետևանքներ է ունենալու թշնամու համար, իսկ պատասխանը լինելու է կոշտ, ինչպես երբեք»,-հայտարարել է Դավիթ Տոնոյանը:Արցախի պաշտպանության նախարարն իր մարտակոչում նշել է, որ այս անգամ ևս հակառակորդը ձախողելու է: Վարչապետ Փաշինյանն էլ թվիթերի իր միկրոբլոգում գրել է, որ Ադրբեջանի կողմից ագրեսիան նախապես պլանավորված է եղել: Նրա հետ հեռախոսազրույց են ունեցել Հայոց երկու կաթողիկոսները:
«Քանի դեռ մարտերը բավականին ինտենսիվ ընթանում են, կոնկրետ կորուստներ՝ ամփոփիչ տվյալներով, չենք կարող ներկայացնել, դա մեր կողմից կլինի անպատասխանատու »,- հայտարարել է Հայաստանի ՊՆ ներկայացուցիչ Արծրուն Հովհաննիսյանը: Թե ի՞նչ տեսակի զինտեխնիկա է կիրառել հակառակորդը, այս պահին ճշտվում է: Ըստ տարբեր տեղեկությունների՝ բացառությամբ մեկ-երկու ամենամեծ տրամաչափի հրթիռային միջոցների, մնացած բոլոր միջոցները Ադրբեջանը կիրառել է, այդ թվում՝ ավիառումբեր, թռչող սարքեր, ուղղաթիռներ, ԱԹՍ-ներ: Հովհաննիսյանը տեղեկացրել է, որ հարվածներ եղել են նաև հայ-ադրբեջանական սահմանին՝ Վարդենիսի ուղղությամբ, բայց ոչ այդքան ինտենսիվ:
Համաշխարհային հեղինակավոր լրատվամիջոցների գլխագրերում Ադրբեջանի սանձազերծած պատերազմն է ընդդեմ Արցախի: BBC-ն, «Ալ Ջազիրա»-ն, «Դոյչե Վելլե»-ն ու մի շարք այլ պարբերականներ նշում են, որ ադրբեջանական կողմը հրետանային հարվածներ է հասցրել Արցախի հետ սահմանի ամբողջ երկայնքով, ինչպես նաև ԼՂ խաղաղ բնակավայրերի վրա:
Արցախի նախագահը խորհրդարանի արտահերթ նիստում հանդես է եկել հատուկ ուղերձով: Արայիկ Հարությունյանը հայտարարել է ռազմական դրություն և համատարած զորահավաք տասնութից բարձր տարիքային խմբի համար: «Մենք չենք ցանկացել պատերազմ, այս պատերազմը մեզ պարտադրվել է: Մենք կողմնակից ենք խաղաղ բանակցությունների, այսօր էլ հայտարարում ենք՝ ուշ չէ, խելքի եկե՛ք: Տարածաշրջանում հղի հումանիտար աղետի համար պատասխան է տալու անձամբ Ալիևը»,- հայտարարել է Արցախի գերագույն գլխավոր հրամանատարը:
Առավոտյան ժամը 07:10-ին, ադրբեջանական զորքերը շփման գծի ամբողջ երկայնքով սկսել են օդային, հրթիռահրետանային և ցամաքային հարձակում: Թիրախի տակ են նաև խաղաղ բնակավայրերը, այդ թվում՝ Ստեփանակերտը: Ցավոք, Ադրբեջանի լայնածավալ հարձակումը հանգեցրել է քաղաքացիական զոհերի ու վնասների: Մարտունու շրջանում զոհվել են մեկ կին ու մեկ երեխա, կան տարբեր աստիճանի ծանրության տասնյակ վիրավորներ: Մեծամասշտաբ վնասներ են կրել քաղաքացիական ենթակառուցվածքները, հրետակոծվել են նաև դպրոցներ, ներառյալ՝ Ստեփանակերտում: Պաշտպանության բանակը հուժկու հարվածներով կասեցնում է հակառակորդի գործողությունները: Ադրբեջանական զինուժը կորցրել է 2 ուղղաթիռ, 14 անօդաչու թռչող սարք, 3 տանկ: Հակառակորդն ունի կորուստներ։ Մարտերը շփման գծի ամբողջ երկայնքով շարունակվում են:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv