Աննախադեպ տապի մասին խոսում են ոչ միայն Հայաստանում: Եվրոպայում ջերմաստիճանը ժամ առ ժամ նոր ռեկորդներ է սահմանում: Հին աշխարհամասում շոգից փրկվում են քաղաքային լողավազաններում, այգիներում, մի մասն էլ ստիպված ժամանակավոր հեռանում է ցուրտ երկրներ: Ավելի հարավ, Իտալիայում, նույնիսկ լողավազանները չեն փրկում: Երկրի 14 քաղաքում եղանակային վտանգի ամենաբարձր՝ կարմիր աստիճանն է հայտարարված:
Հուրգադայում 2 գիշեր անորոշության մեջ անցկացրած Հայաստանի 132 քաղաքացիները կառավարության ջանքերով վերջապես վերադառնում են տուն: Նրանց տեղափոխող օդանավն արդեն երկնքում է և Երևանի ժամանակով ժամը մոտ 21:20-ին վայրէջք կկատարի «Զվարթնոցում»: Գործադիրն այսօր անցկացրած արտահերթ նիստում որոշել է քաղաքացիներին Հայաստան տեղափոխելու համար պահուստային ֆոնդից հատկացնել 47 միլիոն 198 հազար դրամ: Քանի որ չեղարկվել է նաև հուլիսի 29-ին նախատեսված Հուրգադա-Երևան չվերթը և նույն խնդրին, ըստ էության, բախվելու է ևս 100 քաղաքացի, հունական SpotAir ընկերության հետ ձեռք է բերվել պայմանավորվածություն հուլիսի 26-ին և հուլիսի 29-ին Հուրգադա-Երևան չվերթներ կազմակերպելու համար: Իսկ ի՞նչ անել, որպեսզի հետագայում նման իրավիճակներ այլևս չկրկնվեն: Ոլորտի պատասխանատուններն ու ներկայացուցիչներն արձանագրում են, որ խնդրի լուծման ճանապարհն օրենսդրական կարգավորումներն են:
Հերթական բողոքի ակցիան կառավարության մոտ: Ավտոներկրողները հիմա էլ դժգոհում են, թե արդեն մի քանի օր ճապոնական աճուրդները Հայաստանի օգտատերերին մեքենա չեն վաճառում: Ավտոներկրողները ենթադրում են, որ այս գործում կառավարության մատը խառն է:
Հայաստանը կունենա ազգային անվտանգության նոր ռազմավարություն: Նոր փաստաթուղթ մշակելու պատճառներն, ըստ անվտանգության խորհրդի քարտուղարի, բազմաթիվ են, քանի որ գործող ռազմավարությունը ստեղծվել է 12 տարի առաջ, իսկ դրանից հետո բազմաթիվ փոփոխություններ են տեղի ունեցել: Գլխավոր մարտահրավերը շարունակում են մնալ Արցախի շուրջ զարգացումները: Արմեն Գրիգորյանը նկատել է, որ Երևան-Ստեփանակերտ հարաբերություններն այսօր գտնվում են լավ վիճակում: Խնդիրներ եղել են, բայց դրանք անցյալում են: Լրագրողների խնդրանքով ԱԽ քարտուղարն անդրադարձել է նաև վարչապետի՝ դավադիր ուժերի մասին հայտարարությանը:
Հայաստանի և Ադրբեջանի բարձաստիճան պաշտոնյաների առաջիկա հանդիպումների ժամկետները դեռ հայտնի չեն, սակայն գործընթացը քնած փուլում չէ: Բաքվից ժամանակ առ ժամանակ մեսիջներ են ուղարկում Հայաստան, որոնցում մեծ հաշվով նորություն չկա, ոչ էլ հետքայլ իրենց պահանջներից: Երևանում լսում, վերլուծում, հարկ եղած դեպքում էլ արձագանքում են Բաքվի ուղերձներին: Սա Երևանում տիրող տրամադրությունները շոշափելու Բաքվի միակ փորձը չէ, ժամանակ առ ժամանակ սահմանագիծ է ուղարկվում պաշտպանության նախարար Զաքիր Հասանովը:
Ժամանակակից պատերազմում չի կարող լինել հաղթանակ, առանց վճռական ու շեշտակի հարձակման: Թե ինչպես է պետք իրականացնել ջախջախիչ հարձակումը, դրա ի՞նչ պատմական դեպքեր են եղել, ներկայացրել է պաշտպանության նախարարության խոսնակ Արծրուն Հովհաննիսյանն իր նոր՝ «Հարձակման սիմֆոնիան կամ ջախջախման պատերազմի հասունացումը ռազմարվեստում» գրքում: Այն հայ սպաների համար է: Նոր գրքին առաջինը ծանոթացել է «Էպիկենտրոն»-ի նկարահանող խումբը, նաև հուշ ստացել:
«Մուլտի գրուպ» կոնցեռնի հիմնադիր Գագիկ Ծառուկյանը սիրիացի գործընկերոջ՝ «Սաբաղ գրուպ» ընկերության ղեկավար Ամար Սաբաղի հետ այցելել է Արարատյան դաշտավայր, ծանոթացել իր իսկ նախաձեռնությամբ մեկնարկած սպիտակ ոսկու՝ բամբակի աճեցման գործընթացին: Պատասխանատուները զեկուցել են, որ աշխատանքներն ընթանում են հաջողությամբ և այս պահի դրությամբ արդյունքը գոհացնող է: Խոշորամասշտաբ նախագիծը, որի շնորհիվ կստեղծվեն 1000-ավոր աշխատատեղեր, նպատակ ունի վերակենդանացնել Խորհրդային Հայաստանի հզոր տնտեսության մեծ հռչակ վայելող ճյուղը՝ բամբակագործությունը:
Մեր հասցեն.
ՀՀ, 0036, Երևան Ալիխանյան եղբայրների փող., 2 շենք (Աջափնյակ վարչ. շրջան)
Լրահավաք հեռախոս.
+374 10 39 10 39
Էլ.փոստ.
info@kentron.tv