Վարչապետ Նիկոլ Փաշինյանն այսօր Արարատի մարզում մասնակցել է «Իմ քայլը հանուն Արարատի մարզի» ներդրումային համաժողովին: Միջոցառմանը ներկա են եղել մի քանի տասնյակ սկսնակ գործարարներ, որոնք 16 ներդրումային առաջարկ են ներկայացրել: Իսկ ահա մարզի՝ արդեն կայացած ձեռնարկատերերը պատմել են իրենց հաջողությունների մասին: Իր ելույթում Նիկոլ Փաշինյանը նշել է, որ կառավարության հիմնական խնդիրը ոչ թե մարդկանց ղեկավարելն է, այլ քաջալերելը: «Կառավարության ուղերձը քաղաքացիներին հետևյալն է. դուք ուժեղ եք և դուք կարող եք, դուք կարող եք զարգացնել և իրացնել ձեր ստեղծարար հմտությունները: Կառավարության հիմնական խնդիրն է քաջալերել ձեր բոլոր նախաձեռնությունները, և մենք այսօր ամենօրյա ռեժիմով հենց այս խնդիրն ենք լուծում»,-ընդգծել է վարչապետը: Նա նաև հայտնել է, որ մայիսի 8-ին հանդես է գալու մեծ ասուլիսով և կետ առ կետ ներկայացնելու է այն բոլոր փոփոխությունները, որոնք իր պաշտոնավարման մեկ տարվա ընթացքում տեղի են ունեցել Հայաստանում: Համաժողովին ներկա են եղել նաև Մասիսի քաղաքապետ Դավիթ Համբարձումյանը և Սյունիքի մարզպետ Հունան Պողոսյանը: Նրանք պատասխանել են լրագրողների հարցերին:

Մայիսի 11-ին անցկացվելու է Արցախի ամենասիրված խորհրդանիշներից մեկի՝ ժենգյալով հացի երկրորդ փառատոնը: Այն կազամակերպվում է «Էկոտուրիզմ Արցախում» նախաձեռնության և «Հզոր հաթերք» ծրագրի շրջանակում: Նպատակն է վերաարժևորել ոչ նյութական մշակութային ժառանգությունը, ապահովել զբոսաշրջիկների մեծ հոսք: Փառատոնը հագեցած կլինի մշակութային բազմազան միջոցառումներով:

«Էրեբունի» բժշկական կենտրոնի ու Ռևմատոլոգների հայկական ասոցիացիայի գործակցությամբ կայացել է ռևմատոլոգների 5-րդ ազգային գիտաժողովը: Միջոցառմանը մասնակցել է Եվրոպայից, Ռուսաստանից, նաև Հայաստանի տարբեր բուժհաստատություններից մոտ 250 բժիշկ: Հեղինակավոր բժշկական կենտրոններից և ասոցիացիաներից ժամանած հյուրերը ներկայացրել են ռևամատոլոգիայի արդիական խնդիրները, նաև բժշկության այս ճյուղի ձեռքբերումները:

Այսօր Արցախյան պատերազմի լեգենդար հրամանատար Մուշեղ Մխոյանի՝ «Վոժդ»-ի մահվան 28-րդ տարելիցն է: Մարտական ընկերները, Երկրապահ կամավորականներն ու ազատամարտիկի հարազատներն այցելել են Ծիծեռնակաբերդում գտնվող նրա շիրիմին, խնկարկել ու ծաղիկներ խոնարհել: Մարտական ընկերները հիշել են նրա սխրագործությունները պատերազմի դաշտում և նկատել` Մուշեղ Մխոյանի նման հերոսների շնորհիվ է, որ այսօր ամուր են Հայաստանի ու Արցախի սահմանները:

Այս տարի նշում ենք Հայրենական մեծ պատերազմի հաղթանակի 74-րդ տարին: Պատերազմի հաղթական ավարտին մեծ ներդրում է ունեցել նաև հայ ժողովուրդը: Մեծ հաղթանակի 74-րդ տարեդարձին նվիրված միջոցառում էր կազմակերպել «Ինտեգրացիա և զարգացում» հետազոտության և վերլուծության հասարակական կենտրոնը: Համաժողովին մասնակցել են մեր երկրում հավատարմագրված դեսպանները, ԱԺ տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը, նաև զինվորականներ: