Հայաստանի 6-րդ գումարման Ազգային Ժողովի 3-րդ նստաշրջանի վերջին նիստն ավարտվեց: Խորհրդարանն այսօր հասցրեց երկրորդ ընթերցմամբ քննարկել և ամբողջությամբ ընդունել երեքշաբթի մեկնարկած արտահերթի օրակարգում ընդգրկված օրենսդրական նախագծերը ՝ այդ թվում Պարտադիր կուտակային կենսաթոշակներին և բարեգործությանը վերաբերող նախագծերը: Սա նշանակում է, որ հուլիսի 1-ից ուժի մեջ է մտնում կուտակային կենսաթոշակային համակարգի պարտադիր բաղադրիչը։ Բարեգործության մասին օրենքի նախագծի քվեարկությունից առաջ Ծառուկյան խմբակցության պատգամավոր Նաիրա Զոհրաբյանը ևս մեկ անգամ պարզաբանել է առաջարկվող փոփոխության վերաբերյալ Ծառուկյան խմբակցության դիրքորոշումը՝ ոչ ճշգրիտ և ոչ պրոֆեսիոնալ համարելով լրատվամիջոցներից մեկի տեղեկատվությունը նախգծի վերաբերյալ:
Երկրապահ կամավորական միության անդամները միաձայն որոշել են կասեցնել վարչության նախագահ Մանվել Գրիգորյանի լիազորությունները: Նրանք խստորեն դատապարտել են հրեշավոր երևույթը, որը վարկաբեկում է հազարավոր ազնիվ ու հայրենասեր երկրապահների անունը: Արտահերթ նիստին մասնակցել են ԵԿՄ անդամներ, տարածքային կառույցի ղեկավարներ, ԵԿՄ փոխնախագահներ, նաեւ ԵԿՄ-ից հեռացած ազատամարտիկներ: Որքանո՞վ է հավաստի տեղեկությունը, թե Մանվել Գրիգորյանը ճնշում է ԵԿՄ-ականներին:
Այսօր Կառավարության նիստից հետո ՀՀ Ոստիկանապետ Վալերիյ Օսիպյանը պատասխանել է լրագրողների հարցերին: Նա խոսել է ոստիկանության վերջին օրերի բացահայտումներից, անդրադարձել «Սեքյուրիթի Դրիմ» ընկերությունում իրականցված ստուգումների, «օրենքով գողերի» և քրեակական հեղինակությունների բնակարաններում խուզարկությունների մասին:
Արմավիրի մարզում երեկ մոտ 30 րոպե տեղացած լորի ձվի մեծությամբ կարկուտը վնասել է Արագած, Ամբերդ, Աղավնատուն և Լեռնամերձ համայնքների այգիներն ու հողամասերը: Կարկուտից հետո մարզպետ Գագիկ Միրիջանյանը հանդիպել է գյուղացիների հետ և խնդրել տեղում ստեղծել հանձնաժողովներ, որպեսզի գնահատեն վնասի չափն ու ներկայացնեն մարզպետարան: Էպիկենտրոնի նկարահանող խումբը եղել է կարկուտից տուժած գյուղերում: