«Մարտերը ծանր են, բայց հաղթելու ենք»,- Ֆեյսբուքում գրել է Արծրուն Հովհաննիսյանը: ՊԲ-ին հաջողվել է կասեցնել այսօր հակառակորդի ձենարկած լայնածավալ հարձակումը։ Ուղղություններից մեկով մեր ուժերը հակահարձակման են անցել: Մնացած թևերում պաշտպանական ծանր մարտեր են ընթանում: Թշնամին նոր ուժեր է նետել ռազմաճակատ, ամբողջ զինանոցով թիրախավորել է նաև Արցախի խաղաղ բնակավայրերն ու քաղաքացիական այնպիսի օբյեկտները, որոնք կարող են բնապահպանական աղետ առաջացնել: «Այսօր վճռվում է ոչ միայն բոլորիս, այլև տարածաշրջանի ճակատագիրը»,-Ֆեյսբուքում գրել է Արծրուն Հովհաննիսյանը: ՊՆ ներկայացուցիչը նաև լուսանակար է հրապարակել, որում երևում է թուրքական արկը Վարդենիսի Կութ Գյուղում:Հրապարակվել են նաև Ադրբեջանի բանակի զրահատեխնիկայի խոցումը և վերջինիս ստորաբաժանման նահանջն արձանագրած կադրեր:

Ադրբեջանական բանակի շարքերում կռվող սիրիացի վարձկանների թեման շարունակում է մնալ ոչ միայն համաշխարհային առաջնորդների, այլ նաև միջազգային լրատվամիջոցների քննարկման թեման: «Անթույլատրելի՛ է». միջազգային հանրության դատապարտող արձագանքն է Արցախի դեմ պատերազմում Թուրքիայի աջակցությամբ ահաբեկիչ գրոհայինների ներգրավմանը: France Press գործակալությանը հաջողվել է զրուցել իսլամիստներից մեկի հետ, հեղինակավոր The Guardian –ն ու Al Arabiya-ն էլ տեղեկացնում են սիրիացի վարձկանների զոհվելու մասին:

Ի՞նչ վիճակում է հրետակոծված Ստեփանակերտը և ի՞նչ տրամադրություն ունեն արցախցիները: «Էպիկենտրոն»-ի նկարահանող խմբերը շարունակում են աշխատանքը թշնամու թիրախում հայտնված Արցախում: Արթուր Հակոբյանն այցելել է հրետակոծված հատվածներ, զրուցել իրենց հողն ու տունը կյանքի գնով պահող ստեփանակերտցիների հետ: Նրանք համոզմամբ՝ թշնամին զենքերն ուղղել է խաղաղ բնակչության վրա , քանի որ պարտություն է կրում մարտի դաշտում:

Համախմբվել և զորակից դառնալ Արցախին և մեր բանակին: Արցախի թեմի առաջնորդ Պարգև սրբազանը կոչով դիմել է ամբողջ հայությանը: «Մենք երբեք պատերազմ չենք սկսել, երբեք զինադադարը չենք խախտել, բայց ամեն անգամ նենգաբար մեր դեմ սկսում են պատերազմել»,-ասել է Արցախի թեմի առաջնորդը: Նա կոչ է արել Երևանի ժամանակով ժամը 18.00-ին միասնական աղոթք հնչեցնել հաջողության, խաղաղության և հաղթանակի համար:

Հակառակորդի ԱԹՍ-ի հարվածները մեծ վնաս են հասցրել Գեղարքունիքի մարզի Մեծ Մասրիկ համայնքին:Մեկ խաղաղ բնակիչ զոհվել է, երկուսը՝ վիրավորվել: Հարվածներից մեկը հասցվել է բնակելի տան ուղղությամբ, ինչի հետևանքով այն ամբողջությամբ փլուզվել է: Վնասվել են նաև ճանապարհներ ու այլ ենթակառուցվածքներ:

Արցախի նախագահը հատուկ նշանակության ստորաբաժանումների հետ մեկնում է առաջնագիծ: Այսօր վաղ առավոտյան ՖԲ-ի էջում կատարած գրառմամբ Արայիկ Հարությունյանը կոչ է արել բոլորին՝ անհապաղ ոտքի կանգնել և անմնացորդ նվիրումով պաշտպանել սեփական հայրենիքում առանց գոյաբանական վտանգի ապրելու հայերի անքակտելի իրավունքը:«Սա մեր վերջին մարտն է, որը մենք անպայման միասին հաղթելու ենք:Ձեզ հետ եմ մինչև ՀԱՂԹԱՆԱԿ»,- գրել է նախագահը: