Ադրբեջանի կողմից Երևանի ԵԱՀԿ գրասենյակի փակումը գործողություն է հենց ԵԱՀԿ-ի դեմ: Գրասենյակը Հարավային Կովկասում միակ լիարժեք ներկայությունն էր համարվում, սակայն Ադրբեջանը, կիրառելով վետոյի իր իրավունքը, արգելանք սահմանեց ժամկետի երկարաձգման համար, հայտարարել է Հայաստանի արտաքին գործերի նախարար Էդվարդ Նալբանդյանը՝ ԵԱՀԿ գլխավոր քարտուղար Լամբերտո Զանիերի հետ համատեղ ասուլիսի ժամանակ: Եվրոպացի պաշտոնյան մեր երկիր է այցելել Էդվարդ Նալբանդյանի հրավերով : Հայաստանի արտգործնախարարը ԵԱՀԿ գլխավոր քարտուղարի հետ խոսել են Արցախի խնդրի կարգավորման գործընթացի մասին,  կարևոր համարել  Վիեննայի և Սանկտ Պետերբուրգի պայմանավորվածությունների կատարումը, որին Ադրբեջանը շարունակում է խոչընդոտել: